Kashmir nung telongpur 7, police ka khaset

Jammu/Srinagar, Sept.11 (Agencies): Tanü Deobar nü  Jammu & Kashmir kübok Poonch district nung telongpurtem o police na anogo piyong katepba mapang telongpur asem den police ka taküm samaogo. Ano, tanüsa Kupwara ta ajaba tesem ka nung army-temi telongpurtem mita aoba mapang parnoki telongpur pezü khaset.
Police osang ka ajanga ashiba agi,  Poonch nung telongpurtemji khasetba mapang ano Poonch town nung tang tesüdak mini secretariat nungi telongpurtemi injang yokba ki telongi irr army-temi parnokji khaset.
Tanep telongpurtem o police na tsüngda khatep tenzükdang, police ka khaset aser sub-inpector ka den civilian ka yiru.
” Army commando-temi tanü nikongdang telongpurtem atsükoka aliba tesem ajak makyonga aoba mapang telongpurtem jagi injang yokba ngua parnok jena aotsüba lenmang ajak tamasa nokdanga ayu aser aji sür külen parnok alidak mini secretariat asütsü atema asüba ki kilong jagi irr parnok ajakji khaset,” ta senior police ketdangser kati metetdaktsü.
Ano, Kupwara nungbo arrtsülen (LoC) Nowgam sector ta ajaba tesem nung sepaitemi telongpurtem kar aitya angu, anungji parnok denji raradang telongpur pezü khaset  ta police ketdangser jagisa ashi.
Deobar anepdangsa Bandipora ta ajaba tesem ka nunga Gurez sector anasa LOC nung telongpurtem aittsü merangba ngua army-temi sashia mita nokdangba ajanga maitet meyipa ao ta police osang ajangasa metetdaktsü.