European Union-i temelenshi agitsü ajungshir: Szydlo

Warsaw, September 13 (Agencies): European Union (EU)-i nungdakba temelenshi agitsü tajungshiba olen ka Poland Ato Kilonser, Beata Szydlo-i tanü, Mongolbar nü metetdaktsüogo.
Poland yimtiba, Warsaw nung European Council Tir, Donald Trump den ajurutepa senden ka amendang Szydlo-i tanü iba tajungshiba olenji metetdaktsü.
Britain-i brexit ta ajaba EU toktsütsü telemtetba agiba sülen par linük medeni EU-i par tarutsü mera agitsü den sentakba senden Slovakia yimtiba, Bratislava nung amentsü anogo 3 shi anünga alidang Szydlo-i Trump den tanü ajuruteper lir.
“Tan Hokolbar nü amentsü ayongba senden nung EU nung yimtenren aser rongsenren temelenshi agitsü onük benoktsü renema lir,” ta Szydlo-i tesüiba Poland Ato Kilonser, Trump den tanü lemsatepa liasü.
EU treaty tezüngzüktep densema, EU-i nungdakba temelenshi agitsü asoshi Poland densema, Europe tiyongtsü aser anüdoklen tentetba linük lenirtemi EU lenirtem ajungshia aruba osang jangjaogo.
“EU nung züngsemba linüktemi yimtenren telemtetba agitsüsa EU lenirtemi lenmang sadema melapoktsür aser iba yongji,  Britian-i brexit telemtetba taküm 2016 küm June ita agiogo,” ta EU nung züngsemba linüktem indang tangatetba lemsatepa, Szydlo-i ashi.
Poland densemba EU linüktemi par linük tiyongtsüi refugee aser migrant nisungtem maitdaktsüi item nisungtemji par linük tezülen tentetba refugee nisung jenokdak jenoka lidaktsütsü onüka benoka lir.