Naga nunger loktiliba nung ochimashi agi sünga lir: Angh

Dimapur, September 13 (TYO): September 13, 2016 nü Nagaland Angh, P.B Acharya-i Phek district kübok Lozaphuhu, Phek aser Chizami yimtsüngtem semdang.
Yimdaklirtem den jembidang Acharya-i, “Naga nunger loktiliba nung ochimashi agi sünga lir aser iba ya asenok asoshi tashidak tulutiba lir. Asen loktiliba nung ochimashi anema mulungtet teloktem nung lennirtem aser sendaka alir ajaki ola adoktsüla,” ta tayongzükba agütsü.
Angh-isa tashitait loktiliba ka akümtsü atema yimdaklirtem tsüngda aser ano anameta aliba yimtsüngtem den tesentaktep tajung ayutsü ayongzük.
P.B Acharya-i yimdaklirtem dang mithun metsüba nung tajangzük lir ta ashi aser paisa mithun metsüba maparen tuluba nung inyaktsü ajungmeso.
“Nagaland State cabinet-i tetsür nem shilem lemzüktsütsü atema telemtetba agibaji kanga dang tasütait mapa ka lir aser iba asoshi sorkar nem tenüngsang agütsür. Asenoki tetsürtem teküpokba jenjang nung mayutsüla kechiyong parnoki kechisarena aika nung tebur den kasa inyakteter,” ta Angh-isa ashi.
Nagaland Angh-i Phek district sema senzüdang yimtsüng balalai pa nem tezüluba nung takhangba kar agütsü aser item rongnung Tizu river hydro project densema lir. Iba dak sendakba nung Angh-i ashiba agi, “Electricity adoktsü atema tzü kanga tongtibang, aser kodang electricity lidir industry lapoktsü, aser kodang industry lapokdir mapa inyakdak angur.”
Paisa, yimdaklirtem dang ali rongsen raksa meindoktsü saka tajangzük ngua amshitsü ayongzük.
Iba mapang School education Minister, Yitachu aser MLA, Kuzholuzo Nienu nati Angh Acharya meina senzü.