IOC-i Russia telok nungi Beijing Olympic medal 2 meyipa agir

Lausanne, September 13 (Agencies): Russia teloki 2008 Beijing Olympics nung agizükba track & field medal 2 tashi meyipa agiba osang ka International Olympic Committee (IOC)-i tanü, Mongolbar nü metetdaktsüogo.
Beijing Olympics asayaba mapang asayartemi ozüng alema tali tashi itshitsü anabolic steroid mozü achiba kuli ngutetba sülen IOC-i medal 2 meyipa agiba den külemi, Russia asayar 4 tashi Beijing Olympics nung toktepa shilem agitsü metemsüi kümdaktsüogo.
“Maria Abakumova-i agizükba tetsür javelin silver medal aser Denis Alexeev-i agizükba tebur 4x400m relay team bronze medal meyipa agiba den külemi, tena prongla Beijing asayamong nung toktepa shilem agitsü metemsüi kümdaktsüogo,” ta IOC-i osang jangjashitsü.
Tan Russia nungi Beijing Olympics medal 2 tashi meyipa agiba ajanga Britain teloki kasa asayamong indang bronze medal 2 tashi ngusemtsü jenjang tajung nguogo.
Javelin tetoktepba nung Germany tsür, Christina Obergfoell-i silver medal agizüktsü aser 4 buba jenjang angur Britain tsür, Goldie Sayers bronze medal agizüker akümtsü.
Ano, tebur relay tetoktepba nung Britian teloki 4 buba jenjang angu aser iba yongji par teloki bronze medal agizüktsü akok.