Uttar Pradesh, Bijnore nung nisung pezü kahset

Lucknow (Uttar Pradesh), September 16 (Agencies): Hokolbarnü Uttar Pradesh, Bijnore nung tebur kari school azünger tetsür kar mesüshiba nungi tamangba lokti tsüngda rara tulu adoka nisung pezü tashi kahsetogo.
Rara adokba mapang nisung kari injang kahloktsü, koba ajanga minority nungi (Muslim)  nisung pezü kahset aser nisung pongu yiru, ta police-i ashi.
Yirua alirtemji anameta aliba hospital-i anir ao, ta Home Department ketdangser kati ashi.
Asürtemji Ehsaan, Sartaaz, Anees aser Rizwan nunger aser yirua alirtemji Furkan, Ansar, Saleem, Aladdin, Shahnawaz aser Sarfaraz nunger lir ta jangjaogo.
Iba tatalokba sülen parnok kibong züngsemtem aser kinüngertemi ain adoka dokan aika raksatsü aser ki kar rongtoktsü. Parnokisa tasümang jagi  highway mokdanga ayu.
Iba rara adokba sülen police ana – sub-inspector ka aser constable ka mapa nungi anentsüogo.
Rara adokdaktsür nisung pongu pua lir aser tang parnok dang asüngdangyadar, ta police ketdangserisa ashi.
Osang angazükba agi, nisung kari school azünger tetsür kar mapangshia mesüshir ta police nem ken o aiben agüjaka police-i kecha meinyaki aruba ajanga iba lendong tulu atalokogo.