Taliban, IS, Boko Haram sülen kiralongrar tamajungbaji Maoists

New Delhi, September 16 (Agencies): 2015 küm alima nung kiralongrartemi amakba 11,774 ben liasü, iba mapang nung nisung 28,328 asü aser nisung 35,320 tashi yirua liasü.
Alima nung kiralongra ajanga tamajungtiba kongshiba linüktem rongnung Iraq, Afghanistan aser Pakistan sülen pezübuba jenjang nung India linük lir.
2015 küm India nung kiralongrartemi amakba tatalokba 791 nungi shilem 43 bo Maoists teloki amakba liasü. Iba mapang nung India nunger nisung 289 tashi süogo.
‘Study of Terrorism and Responses to Terrorism’ atema National Consortium-i data bendena liasü. Iba osang ajanga ashiba agi, alima nung kiralongrar telok tamajungtibaji Taliban lir, iba sülen tanabuba, tasembuba aser pezübuba jenjang nung Islamic State (IS),  Boko Haram aser CPI (Maoist) telungpurtem lir.
2015 küm CPI(Maoist)-i linük nung kiralongra 343 ben tashi inyak aser iba mapang nung nisung 176  tepset.
Kasa küm nung Taliban-i 1,093 ben amakba nung nisung 4,512 tepset, Islamic State-i 931 ben amakba nung nisung 6,050 tepset aser Boko Haram-i 491 ben amakba nung nisung 5,450 tashi tepset.
Kasa tarensen jenjang 5buba nung Kurdistan Workers’ Party (PKK) teloki 238 ben amakba nung nisung 287 tepset.
India nung kiralongraba shilem tesadang kabo state pezü- Chhattisgarh (21%), Manipur (12%), Jammu & Kashmir (11%) aser Jharkhand (10%) state tem nung liasü.  Chhattisgarh nung 2014 küm Maoists-i 76 ben kiralongraa liasü aser 2015 küm nungbo anasü agi tali, 167 ben kiralongraa liasü.
Kasa osang ajanga ashiba agi, linük nung timtem agütsür/kiralongrar telok 45 shi liasü aser item rongnung timtem agütsüba shilem 43 bo Maoists teloki liasü.
Home ministry data ajanga-a, 2010 aser 2015 küm tsüngda Maoists-i civilian 2,162 aser security sepai 802 tepsetogo, ta metetdaktsüogo.