Asür Isak Swu anema jembir ka nem GPRN-i tatok agütsü

Dimapur, September 16 (TYO): Naga linük atema akümli piyong nendaka inyaker ka alima nungi pilaba bilemteta, pai Naga nungerji Tsüngremi shimtetba nüburtem ta jembiba bilemteter; pa asüba ajanga tejashi aser tapok adokogo, linük nokinketer, asür Isak Chishi Swu-i mapa tulu tulu yutsür asübaji Naga nunger atema tapok tulu asütsü, ta tanü GPRN, Ministry of Information & Publicity (MIP) sangdong ka ajanga metetdaktsü.
Naga nunger aser Northeast nisungtem iba ama tejashi mangyim tulu mapang ka nung alidang teshisadangba makai Manipur, Tamenglong District kübok L-Pabram yim nungi Hulungsung Pamei aser Rangkiusiliu na jabaso arishi küm 19, lanur Chingkhiungam H Pamei-i June 28, 2016 nü pa indang facebook nung asen lenir indang kecha memeteti tejashitsü aketba o sangdong, ta MIP sangdong nung shia lir.
Pa indang facebook nungji pai yamai zülua liasü, “ISAK SWU….. na asüba ajanga ni kanga pelar…. Na molumi nung ajurudi… Sala Nagaland atema kechi inyaktsü??? Nai nü tashi agi Nagaland meyanglushitet…. Sala auer ISAK….” ta MIP-isa ashi.
“Iba ama shisatsü shitak maliba nisung ka nungi o tamagitsü aser lennir sensamasatsüa jembiba jembiba ajanga tensa tamajung ka adokdaktsü. Mekümdangra iba tensa ajanga lendong tuluka adokla. Linük rangbeni asen lenir atema mangyimba mapang ka nung iba ama oji tagizüktettsüla ka masü aser tatok agütsütsüla ka masü, iba ama oji meimchiri agizüktettsüla o ka masü. Pa nem temerenshi tulu agütsütsü langa liasü, firing squad kati kahsettsüsa langa liasü. Ibayongji NSCN lenirtemi idangyongjisa iba nisungbaji aputsü tuyu, aser Naga Army Intelligence osang ajanga aser Thungbo Brigade Commander lenisüba kübok paji July 6, 2016 nü apu aser jungjunga asüngdangyatsü atema ayu,” ta GPRN, MIP sangdong nung shia lir.
Pai aibelen nangzükba aser tatok meshiba ajanga NSCN/GPRN-i asen lenir, asür Chairman, Isak Chishi Swu tenüng nung aser pai tatemsabuba Naga nunger dangi züluba shidi nung yimjung aser reconciliation atema inyaktsü ajungshiba nung ajemdaker iba ama tagitak makaba nisung nem tatok agüja tarutsü nung iba ama meinyaktsü shir August 12, 2016 anogo nung chiokogo, Ta sangdong nung shia lir.
NSCN-i social media amshir ajak dang, lokti nung tensa meraksatsüsa kanga kümdanga post asütsü mepishir, ta GPRN, MIP sangdong ajangasa metetdaktsü.