Syria nung teyari osettsüset agütsütsü mapatong anena atar: UN

Geneva, September 20 (Agencies): United Nations (UN)-i Syria ajunga nung nungdakba teyari osettsüset agütsütsü mapatong ajunga anena atatsü lemtetba osang ka tanü, Mongolbar nü metetdaktsüogo.
Mejangjatetba mitkartemi par tayimtsü amshia, UN-i ketdang asüba teyari agütsütsü osettsüset abenba gari 18 shi Syria kübok Aleppo province nung amakba sülen UN-i Syria nung teyari agütsüsü mapatongji anena atatsü renem.
Kasa lendong nung teyari agütsür ketdangser nisung 1 aser nübur nisung 20 shi tepsetba den külemi, mozüki 1 aser osettsüset rizünga ayudak 1 poksatsüba osang jangjaogo.
“Syria nung teyari agütsütsü mapatong anena atatsü renemba ajanga tebang agi meshiteti timtem toushi tia ajurua alir nübur nisung million aika kanga dang timtemdaktsütsü,” ta International Committee of the Red Cross (ICRC)-ia metetdaktsüogo.
“Syria nung nungdakbapur ajunga nem teyari agütsütsü mulunga lir saka Syria nung tensa tajungba maküm tashi par nüburtem nem teyari agütsütsü mapatong anena atatsü renemogo,” ta UN humanitarian aid otongdar, Jens Laerke-i osang jangjashitsü.
“Tan amakba lendong nung Syrian Arab Red Crescent (SARC) ketdangser 1 aser nübur 20 tashi tepsetba osang jangjaogo. Tan amakba maparenji memetetsümonga inyak ta kuli ngutetra, ibaji tongpang raradang ozüng alema inyakba ken o nung aibelener alitsü. Iba osang jangjatsü atema bushisüngdang tenzükogo,” ta UN aid lenisang, Stephen O’Brien-ia metetdaktsü.
Paisa ashiba agi, Syria ajunga nung nungdakbapur ajunga nem teyari osettsüset agütsütsü asoshi Syria sorkari melaba sülen teyari agütsütsü mapatong inyaktsü osang  Russia aser US densema, Syria nung tongpang rara alir telok ajunga dang mapang jilia metetdaktsü.
“Tan nüburtem nem teyari agütsürtem amakbaji alima jenjang nung nübur temeten anema inyakba aser khen yongi magizüktetba maparen lir,” ta ICRC nung Tir, Peter Maurer-ia kanga jashia ashi.
UN aser Syrian Arab Red Crescent (SARC) nati aroki lungjemer ketdang asüba teyari agütsütsü truck gari 31 nungi gari 18 tashi tan amakdang poksatsüba osang jangjaogo aser teyari osettsüsetji Aleppo province kübok Urm al-Kubra jila nung alir nisung 78,000 nem agütsütsü renema aliba osanga bushitetogo.