Kecha agia immigration nokdangtsü makok: Pena Nieto

United Nations, September 20 (Agencies): Alima ajunga nung nüburtemi tesem ka toktsür tesem tanga ka nung jenokba aser sobaliba balala meyoktepbaren kecha agia menokdangtettsü ta Mexico Tir, Enrique Pena Nieto-i yashi, Hombar nü metetdaktsüogo.
US Tir election nung par Mexico linük anüdoklentip tsütsü densemba arrtsü kanga tongtipangsüa benoka jembitsü tenzükba mapang ka nung Nieto-i tan iba olenji sangoktsür lir.
Republican yimtenren telok nungi US Tir menden atema candidate ama toktepsang, Donald Trump-i pa US Tir akümba sülen par linük telungi migrant nisungtem maitdaktsüi nokdangtsü mechi Mexico arrtsülen lungnang anangtsü bilemba osang sangoktsüba sülen Nieto-i Trump den taoba August ita 31 nü ajurutepa liasü.
“Nübur kin kati pei talidak toktsür tanga tesem nung jenoka alibaren aser meimchir sobaliba balala meyoktepa akümbaren kecha agia menokdangtetba kuli puti otsü ajanga aseni angur,” ta United Nations (UN) tesepti, New York yimti nung amenba UN General Assembly senden nung o jembidang Nieto-i nenshia ashi.
“Nübur kin kati pei talidak toktsür tanga tesem nung jenoka alitsürenji ayong agia menokdangteter kechiyong nüburtemi apu yanglua ayongjia ajangdanger. Miemchiri ajuruba tenokdangba mesüra tetsükdakba ajunga madak takok ngua, tajakleni mera  agiba kuli tejangja lir kechiyong meimchirtemi tesem ka toktsür tesem ka nung jenokba maparenji taküm aliba tongti shilem ka lir,” ta pai sangoktsü.
“Ozü Mexico nüburtem ya mestizo ta ajaba sobaliba temeyoktep benshiba aser tetsütebo balala nungi jakzükba nübur lir. Tarutsü nung alima ajunga nung meimchir meyoktepa akümtsü aser ibaji meimchir senmang lir,” ta pai shisem.