Minister Yitachu-i BA courses atema guidebooks sayatsüogo

Kohima, September 20 (TYO): Tanü Kohima College, Kohima nung School Education & SCERT Minister, Yitachu-i Dr. Bweyhunle Khing-i züluba kaket asem sayatsüogo.
Lai züluba kaket asemji: A complete book on Education in Modern India for Bachelor of Arts (BA); A complete Guide Book on Educational Measurement and Evaluation BA (Honours) Education IV Semester Nagaland University aser A complete Guide Book on Psychological Bases of Education, BA Degree Course 1st Semester, second edition, Nagaland University lir.
Iba sentong nung jembidang Yitachu-i Nagaland indang azüngtsü-zülutsü metetba jenjangji national level dang nungi temaba liaka Naga nungeri ano chichiba shisaliokbo mangu, ta ashi.
Iba dak sentakba nung paisa, “Temetetba shisatsüji tashi lir, aser ibaji shisaliok nungi angur,” ta ashi.
Minister-isa, “State nung tesayurtemi shisaliok agütsütsü atema tezülen aliba tesem aser yimtsüngtemi mouner, aser yimtsüngtem nung alirtemi shisaliok mongura state renloktsüji tamakoktsü,” ta metetdaktsü.
Kaketshirtem aser tesayurtem ajangzüktsü atema guidebook asem züluba atema Dr. Khing nem tenüngsang agütsüba den külemi minister-i, state nung school aser college tem atema kakettem jenjang tajungba akümtsü atema local kaketzülurtem nem maongka agütsütsüla, ta ashi.
Paisa ashiba agi, SCERT-i elementary level tashi text books adoktsüla, ajisüaka tang tashi nungbo class-V tashi dang kakettem agütsür. Syllabus nung local curriculum-a alitsü atema local kaket zülurtem nem maongka agütsütsüla.
Tesasaba olen ka lemsatepdang Minister-i, Naga lokti nung ochishia alitsü sobaliba samadar, ochi medeni telemtetba shitak magitettsü, ta ashi.
“Tang Naga nunger lenmang tai ajanga tajangzük angutsü meranger saka tim lenmang agi tajangzük angutsü azümesener. Anungji Naga lokti tekjakleni aotsü atema ochiba nem len anidaktsütsüla,” ta paisa shisem.
Kaket zülur Dr. Bweyhunle Khing-ia, tesayur ka ama tanurtem school aser shisaliok rejutem nungi tazüngba anenba atema tebilemtsü akar, ibayongji item kaket zülutsü lai lemtet, koba ajanga shisaliok nung majunger kaetshirtem teyari anguba dang masü saka tetoktepba tatidang balala atema renemshitsütettsü, ta ashi.
Laisa, “School aser college azüngba yutsür lanurtem timbaka ozüng alema inyakba mapatem nung ajemoker, koba ajanga lokti menentsür. Item guidebooks ajanga kaketshirtemi pei shisaliok renemtsü aser taküm nung parnok nükjidong ataloktsü imlar,” ta ashi.
Iba sentong ya Kohima College nung Associate Professor & Head of Department (English), Moanungla Kevichusa lenisüba nung agi, Pastor Power Comm, UBC Kohima, Jonathan Mesen-i sarasadema sentong tenzük aser Kohima College Vice Principal, Khrienuo-i tepela anküp o jembia liasü.