Junga tsünütetba tsünütsütem nung temulung agütsütsüla: CS

Kohima, September 20 (TYO) : Nagaland nung aluyimertemi pei pei tesem nung junga tsünütetba tsünüsenbongtsütem nung temulung agütsütsüla, ta Chief Secretary, Pankaj Kumar-i tanü ayongzük.
Agriculture Technology Management Agency (ATMA) Kohima-i Kohima local ground nung ayongzükba Exhibition-cum-Sales Day lapoktsüdang, Pankaj Kumar-i ashiba agi, shishilembatsü atema tsünüsenbongtsü supply shitak nüngdaker, anungji aluyimertemi pei tesem nung junga tsünütetbatem ang tsünütsüla.
“Mozü medeni tsünütetba chiyungtsütem peria shishilembatsüla. Iba ya ajanga aluyimertem tajangzük angutsü, anungji agri aser allied department temi aluyimertem shishilembatsü atema teyari agütsütsüla,” ta paisa ayongzük.
Sentong nung Kohima Deputy Commissioner & Governing Board (ATMA Kohima) Chairman, Rovilatuo Mor-ia o jembidang ashiba agi, “aluyimertemi Agri aser allied department tem indang tsünüsenbongtsü balala sayutsü atema iba exhibition cum sales day ya ayongzüka amunger.”
Sentong nung APC aser Commissioner & Secy., Imkonglemba aser Netherland nungi aruba Floris Van Der Pol o South Africa nungi aruba Michael Arnoldus nungertemia o tatsütsü jembi.