Balaji Temple nung nisung kou yokdokba ajanga sen crore 17.82 aru

Tirupati, September 21 (Agencies): Hindu nunger Lord Venkateswara indang tekülem ki nung taküm July aser August nung nisung kou tenla agütsüba auction asüba nung sen crore 17.82 aazükogo.
Tekülemertemi tenla agütsüba kou yokdokba nung July ita sen crore 11.88 aser August ita sen crore 5.94 crore angu, ta Andhra Pradesh nung Tirumala Tirupati Devasthanams (TTD) nung ketdangsertemi ashi.
Taküm sen crore 11.28 agi mamatzü 39.32 lakh litres alitsü aser angati alemtsü atema telemtetba agiogo. Mamatzüji tekülem kidangi anir arur kinü tanurtem nem lema agütsütsü, ta TTD Board, Chairman Chadalavada Krishnamurthy aser Executive Officer Dr D Sambasiva Rao nati osangbener dang ashi.
TTD Board-isa, Karnal Milk foods Ltd, Haryana nungi seret nung sen 376 agi nashi ghee seret 2.25 lakh alitsü lemtetogo. Iba atema sen crore 8.46 enoktsü aser ghee jagi ‘Tirupati Laddu’ yanglutsü.
2016-17 nung nisungtemi tenla agütsüba kou ayokba nung sen crore 150 shi tajangzük angutsü imlar. Iba ya 2016-17 asoshi TTD-i sen crore 2,678 budget yangluba nung ajemdaker asadangba lir, ta TTD Public Relations Officer Dr Talari Ravi-a osangbener dang ashi.
Küm shia Balaji Temple-i tekülemer nisung million 10 shi arur aser parnok rongnung tetsür aser tanurtem dena lir. Parnoki tekülem ki telungi maidang kou ajak ongdoker aser ibaji tezüngzüktep ayuba mapa küma inyakba tamaitsü lir, ta Dr Talari Ravi-isa shisem.