CBFC-i film reprangertem tanurtem ama züngshir: Soha Ali Khan

New Delhi, September 21 (Agencies): Central Board of Film Certification (CBFC)-i film reprangertemji tanurtem ama züngshir ta Soha Ali Khan-i ashi. Mapang ka nungbo tetsü, Sharmila Tagore-a CBFC nung chairman inyakogo.
Soha-i “31st October” film nung shilem agi aser iba film ya CBFC nungi certification angutsü atema tetsükdaktsü aika ajurua liasü.
Indira Gandhi tepsetba sülen mepetmesü adokba nung ajemdaker “31st October” film ya yanglu. Iba onük nung temulung yirutsüsa dena aliba ajanga CBFC nungi temelaba angutsü atema timtem aika ajurua liasü.
“Kanga dang tezüdangogo. Artists ama, onoki censorship magizüker. Onoki certification agizüker saka parnoki khenkhenbo talila agiener ama bilemer,” ta Soha-i osangbener senden ka nung ashi.
“Parnoki (CBFC)-i film reprangertemji tanurtem ama züngshir. Ibaji tezüdangtsü ka lir,” ta laisa shisem.
“31st October” film writer-producer Harry Sachdeva atema kanga bilemtsür kechiyong pa asoshi iba film ya kanga dang tongtibang aser pai yimya tajung agi dang iba film atema mapa inyak, ta Soha-isa metetdaktsü.
Laisa ashiba agi, CBFC-i mezüngbo film nung 40 cuts asütsü ashi aser iba sülen lialiabo cuts ka danga maliasü.