Motzü taolen maka

Tanü asünga akhidang amato tsünglu anogo piyong kechalenia ao majung arunungbo ta kanga shisabolua bilemer, kechiyong tanübo tsünglu minute pongo shi danga arununga motzü agi tesenzü majung lenmang ajunga metsüngbanger. Lenmang nung dang masü saka yimdong nung masemba ajanga taodak maka  ki telongi dena motzü aita nisungtem timtemba angudang meimchir shisamakaba, morumoruba aser pei ajung dang bilemba jakla jangjajangjaa angur. Dimapur ama lenden lima nung balaka tesem kar nungbo pei kimong aser pei li ajanga motsü moudaktsünü nokdanga ayuba ajanga peisasa pei timatemba angur. Item ki kima motsü atsüngba agi kidangi atua majung aser talua majung ta peisasa pei timatemba tang ama mapang ya tesem aika nung angutsü. Ano, nisung aikati tekalen nungi pei li ajanga motzü yoktsü asoshi kanga korua bilemer. Iba jagi tekalen alir kidangertem kanga timtemdaktsür. Ajisüaka, tzü yabo tsünglangleni dang alutsü asünungji tsünglu tulu arua motzü tulu ayimba mapangbo motzü maludaktsütsü nokdangba long jara dena laotsüsa akümer. Atangji, asenok dak yimya tamajung kaji asenoki kilentsü nung anakawa tajung majung ajak enoka toktsür aser ano karibo metsümeshia asür, iba jagi teshinem adoker aser kilentsüa dangpanga ayur. Item ajakji asenoki asenoksasa kidang kiyongertem awashi meteta alitsü memetetba ajanga adoker. Yimtak asüyonga, jila nung asüyonga asen alidak temeket merüka ayutsü aser kima yimdong nung motzü meyimdaktsüi kilentsü nung sademsadema yimdaktsütsüsa yanglutsübaji kiyongertem dak dang keta lir. Kilong nung asüyonga kima yimdong asüyonga merükmejua alitsüba yabo ozüng agi masü saka tangatetba agi inyaktsüba mapa ka lir. Ozüng agütsüyonga tangatetba melira yim nübodoka inyakdang khen serbo odang menenadoktsü. Aji oda, shir südir süaka ki asüdangyongi pei kima aser pei alidak yimdong nung motzü matsüngdaktsütsüsa kilentsü sademsadema yanglua ayutsübaji pei sobaliba asütsüla. Aseni asen kimong ajanga motzü yima meyoknüdang motzüji asen yimdong nung atsüngtsü aser iba jagi asenok tesenzü majung timatemtsü ta rajema inyaktsüla. Yimdong nung motzü ayimba agi tesenzü majung timatemba dang masü saka lenmang raksar. Ibaji meteta senso tajungibo tang ama tsüngluruwa mapang ya tesem kar nung danga motzü sadema moutettsüsa kilentsü süng, long aser anakawa agi nokdanga ngura mapa boluyonga itemji peisasa endoktsütsüla. Iba jagi shingaia memetet nai asen lima asoshi mapa tajung ka inyaker asütsü. Atangji, asen lima nung gari lenmang arr mashiba ya black toping aodang apuapua aoba dang masü saka lenmang nung kilentsü mali lenmang tiyong nung motzü yimdaktsüba agi arr mashir. Itemji angudang engineer-temia pei tetsü taso lima meima tenla ka ama agüja itemji tangatetba tajung agi anepalu nungbo koda jungla ta bilemer. Alima ajungtsüba ya ozüng akangakanga yangluba kija agi majunger mesüra taa asoshi inyakba kija agia majunger, saka sensosangertemi tangatetba tajung agi pei ki aser pei kima ama bilema pei lima asoshi tenla agütsür ama bilema talila awa oa inyakba ajanga dang ajunger. Tatishitsü ka, lenmang lendi nung long tuluka mezüdaka lir, saka asenok ajaki aji ajungdoka endoktsü melen mekünameküna dang senzüra, asenok dak yimkong ajungtsü bilema peisasa mulungteta angati mapa tajung inyaknüba shisatsü malia ta sayur. Iba ama yim aser kiyongji majungtsü, par yimdongji kenyongi mesadem asütsü aser teti janar angutsü. Parnokji khen khen ali tilala atsünga agiba atema raratepa angashitsü, khen khen janaona mashi nung endokba atema mepelatepa adokba angashitsü aser khen khen tekalen nungi motzü yima ludaktsüba atema asatepa angashitsü. Iba ama kiyong lenmang nungji gari tila ana mesüiteptettsü aser tsünglu arudangbo atsü o atsü na tsüngda yim lendi nung tzü taolen maka atsüngba agi awatsüng tuluka kümadoktsü. Iba amaji ali tilaka aginüdang kidang kiyongertem den mepelateptettsüsa aliba dang masü saka asen dena timatemtsüsa mesüi yim lenmangbo sadema lapoktsütsüla, aser asen ki ajanga kilentzü kanga junga yanglua kecha mekorui tekalen nungi aluba motzü yimzüka yoktsüla aser kima yimdonga asen ki kilong ama merüka ayutsüla. Iba ama aliba tesemjiang temerük, tepentet aser putepputepa  telinütsüka asütsü.