Küm 10 tejakdang aliba tia-i meyiner:Deepika

Mumbai, September 22, 2016 : Actress Deepika Padukone-i taküm nung jenjang tajungba akümtsü meranger aser lai, “Ni angazükner aser tajangshibatem dak ajemdaker inner,” ta ashi.
La TV sentong “Vogue BFFs” nung shilem agiba mapang lai taküm nung aginübatem lemsatepa liasü.
“Vogue BFFs” mezüngbuba episode nung ketdangser Kamal Sidhu-i Deepika aser Anaita Shroff Adajania na den tesüiba mapang ajangshibatem asüngdanga jembidang Deepika den la noksa Vogue magazine cover nung pezüben adokba indanga jembisem.
Hollywood nung tang mezüng süa “xXx: The Return of Xander Cage” film nung shilem agitsü alila aser taküm Forbes magazine ajanga actress rongnung sen timba aateter tarensen nung lir ta sangdongla, Deepika-i, “Ni atema tarütsü mapatem kechisa lir item nungji dang rangloker inyakner,” ta ashi.
“Ni aiben yamaji bilemer, aser ni bilembaji shitak asütsü akok. Ni tesüiba küm 10 mapang aliba tia-i meyipa meluner. Ni angazükner, terenlok tajungba nung inner aser tajangshiba ajak nungi angazükner. Ni magazine cover tejentem nung aliba noksaji repranger, ‘ni balaka’ ta ashitsü akok, ajisüaka asenokji melenshia ainer,” ta Deepika-i sangdong ka nung ashi.
Saisaponger ka liasüba model aküm aser tang acting nung shilem agila, Deepika kanga melenshiogo.
Tan tesüsa nai angazükba mapa tasenji kechi, ta asüngdangdang lai, “Ni Italy nunger chiyungtsü sorochioktsü angazük,” ta langzü.
“Vogue BFFs” sentong ya Honibarnü Colors Infinity channel nung sayutsü.