Billionaire Mukesh Ambani India nung takartisang:Forbes

Mumbai, September 22 (Agencies) : Sen billion dollar 22.7 (Rs 151,477 crore) ajangzüktetsang, Reliance Industries Chairman, Mukesh Ambani, India nung küm 9 buba atonga atonga takartisang lir, ta Brihostibarnü America business magazine Forbes India nung sangdongogo.
Arishi küm 59 tain, Ambani ya India nung takar nisung 100 rongnung temaba jenjang nung lir aser pai Reliance Industry tem ajanga ita 12 tsüngda nung noklang nung shilem 21 agi tali ajangzüktetba ajanga yaküm sen billion dollar 18.9 ajangzüktetba dang nungi taküm timba, sen billion dollar 22.7 ajangzükteta jenjang tajungba aküm, ta magazine nungji shia lir.
Iba ita tetenzüklen Reliance-i 4G phone service Jio sayaba sülen tamshirtem nem angadi call asütsü offer lapoktsü aser internet data link-a December 31, 2016 tashi amshitettsüsa lapoktsüogo.
Pa sülen Sun Pharmaceutical Industries nungi Dilip Shangavi India nung tanabuba takartisang lir. Share price ajema akümba ajanga pa nija rongsen sen billion dollar 1.1 agi ajema kümaka pai küm nung sen billion 16.9 ajangzükteter. Ano India nunger takar tarensen nung tasembubaji London nung amenoka aliba Hinduja brothers lir. Parnoki 2015 küm sen billion dollar 14.8 ajangzüktet saka takümbo sen billion dollar 15 ajangzüktet.
Hinduja brothers ya adianu pezü (4)—–Srichand, Gopichand, Prakash aser Ashok nunger indang company lir aser parnoki trucks, lubricants, banking aser cable television amshir.
Wipro, IT czar, Azmi Premji tasembuba jenjang nung liasü saka pezübuba jenjangi luogo.
India nung takartiba 100 rongnung temaba jenjang 10 nung alirtem nisung memelenshi, ajisüaka parnok ajaki ajangzükbaji yaküm sen billion dollar 345 ajangzükba dang nungi taküm noklang nung shilem 10 agi timba lir.
“Taküm adokba list nung India nunger billionaire 100-i ajangzükbaji yaküm dang nungi timba lir,” ta Forbes India Editor Sourav Majumdar-i ashi.
Aji oda süaka takar nisung ti-i (8) parnok company temi yaküm dang nungi taküm noklang nung shilem 12 agi tajungba inyaktetogo ta shia iba list ya aitsüogo.
Item nisung ti rongnung Biocon nung mendenbula Kiran Mazumdar-Shaw-a (jenjang 65buba) densema lir.
Iba list nung nisung tasen trok aitsema lir aser parnok rongnung Bhavin aser Divyank Turakhia (jenjang 95buba, $1.3 billion) na dena lir. Tenati China nunger investor tem dang parnok indang ad tech firm Media.net sen million dollar 900 agi ayokba sülen iba list-i ait.
Baba Ramdev den lokteper Patanjali Ayurved ngutetsang, Acharya Balkrishna  (jenjang 48buba, $2.5 billion) aser Brijmohan Lall Munjal’er jabaso, Hero Group ngutetsang, Pawan Munjal (29, $3.65 billion) nata iba list yagi taküm aitsemer rongnung dena lir.