Modi sorkari aluyimertem atema budget renemtsüla: Rahul Gandhi

Kanpur, September 22 (Agencies): Congress tatong Tir, Rahul Gandhi-i, aluyimertemi parnoki züsentetbatem nung jenjang shitak angutsü atema Narendra Modi’er sorkari ‘Kisan Budget’ renemtsüla, ta ashi.
Ghatumpur nung jembidang Rahul-i, “Railway Budget General Budget nung adentsü ta ni osang angazükogo. Yamaji inyaktetra ni Ato kilonser Narendra Modi dang ‘Kisan budget’ renemtsü asüngdanger,” ta ashi.
Rahul-isa, Kisan Budget ajanga aluyimertemi züsentetba tem nungi jenjang shitak angutsü, tangbo parnoki ibaji mangur, ta ashi.
Centre sorkari industrialist temi sen apua alibabo atoker saka aluyimertemi apua alibabo matoker ta aija Congress leniri, “Congress sorkar atema tongtibangtibaji, aluyimertemi sen apua aliba sentsüh atoktsü, kechiyong onok atemabo aluyimertem aser lanurtemji tongtibangtiba lir,” ta ashi.
Ato kilonser aija Rahul-i, “Ato kilonseri lanur crore ana nem mapa agütsütsü nangzük. Ajisüaka tesüiba küm ana nung lanur lakh ka dang mapa angu ta ni metetogo,” ta metetdaktsü.
Rahul-isa, Opposition ka ama Congress-i pei teinyaktsü shilem junga inyakdar, ta ashi.
Uttar Pradesh nung tan sorkar aser taoba sorkartem aija pai, “Centre nung Congress tashi nung alidangbo project balala atema sen lemzüktsü. Item sentu kong sama ta ni süngmanger,” ta ashi.
BSP aija Rahul-i, “BSP-i ochimashi nung ajemokogo, talisa Kanshi Ram-i tenzükba party tangatetbatem nungi parnoki pilaogo,” ta ashi.
“Uttar Pradesh nung Congress-i sorkar kümra onoki SP aser BSP-i inyakba mapatem bushisüngdangtsü,” ta paisa shisem.