Kü taküm otsü film nung Aamir nem shilem agidaktsüner: Sanjeev Kapoor

Mumbai, September 23, 2016 : Celebrity chef Sanjeev Kapoor-i pa taküm otsü indang film nung Bollywood superstar Aamir Khan nem shilem agidaktsüner.
Max Fashion collection sayaba mapang pa dang taküm otsü film indang asüngdangdang, Kapoor-i, “Kü taküm otsü nung ajemdaker film ka yanglutsü atema jembidar. Ajisüaka ni ano teinyaktsü aika lir. Ni taküm nung nükjidong aika atongtsü anendaka lir,” ta langzü.
“Bollywood nung actor tajung aika lir aser nisung mashi kati kü taküm otsü nung ni ama shilem agitettsü. Aji oda süaka, kü medemer tajung actor Aamir Khan nemang iba shilem agidaktsünüa bilemer,” ta Kapoor-i ashi.
Actress Bhumi Pednekar-a iba sentong nung aden aser lai, ni kanga junga sorochiok mesütetaka Kapoor indang recipe tem meimer, ta ashi.
India nunger kibongtem nung Kapoor tenüng ya kanga nüngtugu süa jembir aser pai TV sentong “Khana Khazana” nung shilem agir. Iba TV sentong ya Asia nung mapang talangtiba sayuba sentong ka lir aser linük 120 tashi nung iba sentong yoker.
January 2011 nung pai pa indang “Food Food” channel ka lapoka lir. Pai Best Executive Chef of India Award aser Mercury Gold Award, Geneva, Switzerland nung anguba den tanga sempet-a aika ngua lir.