Tayimtsü nung Samsung Note 2 ka nungi mokozü adok

New Delhi, September 23 (Agencies) : IndiGo tayimtsü ka nung Samsung Note 2 ka nungi mokozü adoka mena aliba nüburtem aoksatepba sülen, asüngdangya asütsü atema Hokolbarnü India civil aviation regulator-i Samsung India Electronics nung ketdangsertem jaok.
Airlines ajak nung passenger tem Samsung-i yangluba Note ka danga bener meyimdaktsütsü atema advisory ka tentettsü, ta Directorate General of Civil Aviation (DGCA) atema otongdari ashi.
Hokolbar anepdang Singapore nungi Chennai-i aruba IndiGo tayimtsü ka telung nung Samsung Note 2 smartphone ka nungi mokozü adokba sülen iba advisory tentettsü lemtet.
Samsung Note 2 nungi mokokzü adokba mapang tayimtsü nung mena alirtem kanga aoksa. Parnoki mokozü adokba aser langka aronger ama menemshiba sülen cabin crew tem nem osang agütsü.
“Singapore nungi Chennai-i aoba, 6E-054 tayimtsü nung mena alirtemi September 23, 2016 anepdang tayimtsü telung nung mokozü anguba shiogo,” ta IndiGo-i sangdong ka ajanga metetdaktsü.
Cabin crew temi fire extinguisher lapok aser kara kara mokozü adoka aliba Samsung Note 2 smartphone ji tzü sünga aliba pondang ka nung inok.
Iba tayimtsü Chennai airport nung teti ama kanga junga anen aser tamenertema akhi yimya amai aludaktsü, ta passenger temi ashi.
Iba tatalokba dak sentakba nung osang tejangja agitsü atema onoki Samsung nung tongtipur tem den tongtepratepdar kechiba süra onoki ‘customer safety’ atema kanga nendaka bilemer, ta Samsung atema otongdari ashi.
September 9, 2016 nüa DGCA-i tayimtsütem nung Samsung, Galaxy Note 7 mamashitsü metetdaktsüogo.