Turkey lenisang, Erdogan-i US aitsür

Ankara, September 23 (Agencies): US-i tongpang nung amshitsü osettsüset agüja Syria nung tesep tenteta alir Kurd kin nisungtemi tentetba sepai teloktem yarir ta shia, Turkey Tir, Recep Tayyip Erdogan-i US aitsüogo.
Islamist kiralongrar anema raratsüren nung Kurd kin nisungtemi tentetba People’s Protection Units (YPG) sepai teloki yarir ta US-i züngoker saka YPG telok Turkey sorkar anema nokdaker Kurdistan Worker’s Party (PKK) den sentaktepba telok ta shia, par telokji kiralongrar telok ta Turkey sorkari züngshir.
“US-i par tongpang nung amshitsü tayimtsü 2 tashi Syria anüdoklentip tsütsü, Kobane nung tesep tenteta alir YPG telok nem anogo 3 tejaklen agütsüba osang bushitetogo,” ta Erdogan-i yashi, Brehostibar nü ashi.
“Iraq aser Syria na nung tesep tenteta alir Islamic State (IS) kiralongrar telok anema raratsü mapatong nung US-i YPG den yaritepba ajanga par linüki aibelena inyaker kechiyong YPG teloka kiralongrar telok ka dang lir,” ta pai US aija ashi.