Sharif-i UN sabang tim mesüi amshir: BJP

Kozhikode (Kerala), September 23 (Agencies): Pakistan Ato kilonser, Nawaz Sharif-i UN sabang tim mesüi amshir ta aija tanü BJP-i kidanger linük dang, Jammu & Kashmir agitsü mangdang alibaji anentsüla, ta ashi.
UN General Assembly nung jembidang Pakistan Ato kilonseri Kashmir onük aser Hizbul Mujahideen commander, Burhan Wani tepsetba indang jembiba atema aija tanü Kozhikode (Kerala) nung BJP otongdar, Shahnawaz Hussain-i Pakistan dang par linük telung onüktem atema dang inyaktsüla, ta ashi.
Yangi osangbenertem den jembidang BJP lenir Hussian-i, “Pakistan-i UN nung Kashmir onük süoka jembiogo. Parnoki par sentsü shitakbaji sayuogo. Nawaz Sharif-i UN sabang tim mesüi amshiogo. Pai LeT tongti, Hafiz Sayeed mesüka jembi. Pakistan-i Kashmir aginüa bilemba anentsüla aser Balochistan den Sindh kümzüktsü atema dang bilemtsüla,” ta ashi.
BJP Nation council nung adentsü atema Ato kilonser, Narendra Modi-i tzüyimkümlen aliba yimti ya semdangtsü, aser iba senden nung pai tawa Pakistan nungi kiralongrartemi Uri nung army camp ka amakba indang jembitsü imlar.
BJP-isa, kiralongraba tera kuliji Pakistan lir aser iba linük tenüng agi “Athankisthan” ta melentsüla, ta ashi.
United Nations General Assembly nung Kashmir onük süoka jembidang Pakistan lenir Sharif-i Wani ji “lanur lenir ka” ta tushia liasü, iba den külemi Jammu & Kashmir densema tongtibang onüktem latettsü atema India den ken o jembitsü melunga lir, ta metetdakja liasü.
Pakistan lenir maneni aija Hussain-i,  “Nawaz Sharif indang osep nung kiralongrar ajakji ‘lanurtem’ aser ‘temelenshi adokdaktsür’ lenirtem lir,” ta ashi.