Arrtsü anüktsü atema Israel-i India nem technology teyari agütsütsü mulunga lir

New Delhi, September 23 (Agencies): September 18 nü kiralongrartem arrtsü adena arur India army tesep ka amdakdang sepai 18 tepsetba sülen Israel-i Hokolbarnü India dang arrtsü nüka mitba maparen nung teyari agütsütsü mulunga alir ta ashi.
“Home Minister (Rajnath Singh)-i Israel semdangdang Israel nung arrtsü tapu balala aliba sayu” ta Israeli Ambassador, David Carmon-i osangbener senden ka nung metetdaktsü.
Taküm November ita Israel Homeland Security (HLS) aser Cyber 2016 International Conference dak sendakba nung osangbener senden ka ayongzüka agidang David Carmon-i iba olen lemsatep.
“India nung arrtsü tapu balala 14 lir aser itemji units & forces balalai ketdangsüa anüker. Minister (Rajnath)-i Israel semdangba pai ozü arrtsü anükba yimya tasen kar ajiteter alitsü” ta paisa ashi.
Israel aser India nati arrtsü dak sendakba onüktem kasasa ajurur aser iba khuret koktettsü Israel dak telangzübatem mali, saka linük ana longjemer India nung nüngdakba mapatem inyaktsü akok, ta Israel ketdangserisa metetdaktsü.
Paisa ashiba agi, Israel da-i cyber technology amshia arrtsü anüker. Küm aika Israel-i arrtsü nüka mitba nung timtem aika ajangshia aruogo aser tang Israel-i technology teyari ajanga takok ngua iba mapa inyaker, ta taoba Israeli Defence Forces (IDF) Chief Information Security Officer, Ram Dor-ia osangbener dang ashi.
Israel-i aerial vehicles (UAVs) ajanga electro-optical sensors nungi osangtem bendener. Alima nung UAV purapitetba aser yangluba nung Israel ya lennir lir.
November 14 nungi 17, 2016 tashi tel Aviv nung HLS & Cyber 2016 International Conference nung India nunger teshimtet nübo 30 nungi 40 shi ka adentsü sentong lir.