Indus Water Treaty reprangshiba J&K-i pusemtsü: Nirmal Singh

Kozhikode, Sept. 24 (Agencies): 1960 küm India aser Pakistan na tsüngda Indus Water Treaty tezüngzüktep agiba Centre sorkari reprangshitsüa akok, ta jembiba mapang ka nung tanü Jammu & Kashmir deputy chief minister, Nirmal Singh-i, 1960 küm agiba tezüngzüktep atema Centre sorkari kechi telemtetba agidir, ibaji state-i pusemtsü, ta metetdaktsü.
BJP National Council nung adentsü atema Singh tang Kozhikode-i oa lir, aser yangji osangbenertem den jembidang pai, “Iba tezüngzüktep ajanga Jammu & Kashmir kanga takoksa nguogo, kechiyong state nüburtemi ayongtem, talisa Jammu nung aliba Chenab ayongtzü aluyimba aser tanga nüngdaktem atema peria magiteter,” ta ashi.
“Indus Waters Treaty atema Centre-i koba telemtetbatemsa agidir itemji state sorkari pusemtsü,” ta pai ashi.
“Indus Waters Treaty ajanga state-i takoksa tulu anguba indang Jammu & Kashmir nüburtemi jembi tenzüka liasü. Iba dak sentakba nung Centre sorkari telemtetba kar agira ibaji state-i pusemtsü. State nüburtem ajangzüktsüsa agiba meratem ajak onoki pusemtsü,” ta pai ashi.
Tan hopta tetenzüklen India-i, iba ama tezüngzüktep junga alitsü atema tamang katettsü aser amalitepa inyaktsüji kanga tongtibang, ta metetdaktsüogo.
Tawa  kiralongrartemi Uri nung army 18 tepsetba sülen linük nüburtemi sorkar dang Pakistan den tzü lemsaba tezüngzüktep agientsüla ta rongshiba mapang ka nung sorkari iba o jembiogo.
India aser Pakistan na tsüngda tesentaktep tamajungba akümer, anungi sorkari Indus Waters Treaty tezüngzüktep ya reprangshitsü asü, ta asüngdangba langzüdang Ministry of External Affairs otongdar, Vikas Swarup-i, “Iba ya tesem külen nungi dang masütsüla,” ta metetdakja liasü.
Pakistan-i India den 1972 küm Simla Agreement agiba ozüng kübok  meliteter ta aija Nirmal Singh-i, “Simla Agreement ya Pakistan-i mebenshir, ano taoba Ato kilonser, Atal Bihari Vajpayee aser taoba mapang Pakistan Tir, General Parvez Musharraf na tsüngda agiba Lahore tezüngzüktep lir. Iba tezüngzüktep kübok India anema kiralongratsü atema Pakistan-i par litsü nung kiralongraba senotsü agi meyaritsü aser pumasemtsü nangzüka lir,” ta ashi.
Pakistan-i item tezüngzüktep alema inyakra kechiba asenoki itemji benshitsü, ta paisa shisem.