Washington: Police-i nisung 4 tashi kaseter bushir

Washington, September 24 (Agencies): Mejangjatetba tongpang nung amshitsü prangpong abener kati US kübok Washington northwest tsütsülen, Burlington nung tentetba shishilembadak, Cascade Mall nung injang yoka yasüng, Hokolbar aonung lendong kanga sashia atalokdaktsüba osang ka Washington State Patrol otongdar, Mark Francis-i tanü, Honibar nü metetdaktsüogo.
“Seattle nungi anüdoklentip tsütsüleni kilometer 105 shi pilar Burlington nung lendong atalokdaktsüsangi tetsür 4 kasetba aser tebur 1 kanga mejungi yirutsüba osang tang tashi nung jangjaogo,” ta pai osang jangjashitsü.
Yasüng, 7:00 ako meta lendong atalokba sülen police ketdangsertemi Mall ajunga lungbanger lendong ataloktsüsangji bushi saka parnoki nisungbaji mongutetba yong police-i tanü, Honibar nüa lendong ataloktsüsangji maneni bushiba osang angazükogo.
Yasüng yirusangji Seattle nung tentetba Harborview Medical Center nung anepalua aliba aser pa taküm jenjang kanga mejungi aliba osang ka mozü ketdangsertemia metetdaktsüogo.
Tan lendong atalokdaktsüsangji Spain oshi jembir nisung asütsü akok ta police-i metetdaktsüogo aser pai tongpang nung amshitsü rifle prangpong ka abenba osang angazükogo.
“Taonung Washington nung lendong kanga sashia atalokogo. Burlington nung lendong ajuruba atema sasa bilemer,” ta Washington Governor, Jay Inslee-ia yasüng lendong atalokba sülen sangoktsü.
US kübok Minnesota yimti nung police-i pa kasetba jakdang nisung kati kotari agi nisung 9 tashi tsüngseta taoba hopta lendong atalokdaktsüba sülen tan Burlington nung lendongji ataloker lir.