Tanü Sushma-i UNGA nung Pakistan o meyiptsütsü

New York/New Delhi, September 25 (Agencies): Hombarnü External Affairs Minister, Sushma Swaraj-i UN General Assembly nung jembitsü, iba mapang nung lai tamalen UNGA nung Pakistan Ato kilonser, Nawaz Sharif-i Kashmir onük jembiba o meyiptsütsü imlar.
Yashi nikongdang Swaraj New York tonga oa liasü.
Ministry of External Affairs otongdar, Vikas Swarup-i twitter ajanga, “71buba UNGA-i India telok anir aor. EAM @SushmaSwaraj New York tongogo,” ta metetdaktsü.
Pakistan Ato kilonser, Sharif-i UN General Assembly (UNGA) nung jembidang Kashmir nung meimchir dak mapetba mapatem inyakba onük nung ajemdaker India aija liasü, aser Swaraj-i iba oji meyiptsütsü akok.
United Nations General Assembly (UNGA) senden nung UN nung India ketdangser, Syed Akbaruddin-i, kiralongraba ya India atema dang masü saka alima linüktem ajak atema tebilemtsü onük ka lir, ta jembiogo.
Paisa UN Security Council nung temelenshi, sustainable development, climate change aser peacekeeping temji India atema tang telidak UNGA senden nung tongtibang onüktem asütsü, ta metetdaktsüogo.
Yashi osangbenertem den jembidang MEA otongdar, Swarup-i, “Linük aser alima ajaki Swaraj-i jembitsü aliba onük yongyar, lai 71buba UNGA atema India’er “vision document” metetdaktsütsü,” ta ashi.
“External Affairs Minister-i kechisa jembidir, ta linük aser alima rangbeni yongyadar, ajisüaka Akbaruddin-i metetdaktsüba onüktemjia asenoki benoka jembitsü,” ta paisa ashi.
Tamalen Pakistan Ato kilonser, Sharif-i India linük dang, Uri amakbaji Kashmir tensa atema meyiptsüba asütsüa akok, anungji Pakistan nem tai tongloktsüba anenang, ta metetdakja liasü.
UN General Assembly senden nung adenba sülen New York nungi meyipa arudang Sharif London nung anenzüka osangbenertem den jembidang pai, “Uri amakbaji Kashmir nung meimchirtem dak mapetba benshiba mapatem ajanga asütsüa akok, kechiyong tesüiba ita ana nung asürtem aser tenük apokertem kinunger aser temeimertem kanga temelung yiruogo aser jashiogo,” ta metetdakja liasü.