Yimtenren tajangzük atema NDA-i ajak inyaktsü: Mayawati

Lucknow, September 25, 2016: Deobarnü Lucknow nung Bahujan Samaj Party (BSP) tongti, Mayawati-i osangbenertem senden nung jembiba sülen party office-i aoba noksa angur.

Lucknow (Uttar Pradesh), September 25 (Agencies): Ato kilonser, Narendra Modi aija Deobarnü Lucknow nung BSP tongti lenir, Mayawati-i, Ato kilonseri India-Pakisan arrtsülen rara tensa lir ama jembir, ta ashi.
Lucknow nung osangbenertem senden ka nung jembidang Mayawati-i, “Yimtenren nung tajangzük angutsü atema tang BJP-i aniba NDA sokrari ajak inyaktsü,” ta aitsü.
Lai ashiba agi, tang Centre nung BJP-i aniba NDA sorkar tashii aruba sülen Kashmir nung tensa tamajungba kümogo.
Tawa Jammu & Kashmir, Uri nung kiralongrartemi army tesep ka amakba dak sentakba nung Mayawati-i, Modi’er sorkari kiralongra menokdangtetba dang masü saka Kashmir tensa-a mazüokteter, ta aitsü.
BSP tongti lenirsa, Modi-i Pakistan ya rongsenkettsüng nung sensaker ta jembiaka pei linük nüburtem atemabo pai kecha meinyak, ta ashi.
Laisa, NDA bangdak lenirtemi sangdong magütsüdang tamasa junga bushisüngdangtsüla, ta shisem.