Arogo School

Nagaland nung school tajungtemji arogo school lir aser school tamajungtemji government school lir. Aji oda, mapang shia Nagaland government meyong school majungba indang,  tangari dang masü, School Education ministeri anir jembir saka majunger ta angudang arogo nem anepaludaktsü nunga koma süla ta bilemba agi taoba hopta nung ” Nagaland nung Govt. school-tem ya arogo nem reprangdaktsü nunga koma süla (?)” ta asüba nung asenoki bilemdangogo. Atangji, telangzüngertemi ashiba ama, arogoi sorkar mapa reprangtsütsübaji tasak anungji mereprangtettsüa akok, ajisüaka school nung azüngertem tanurtem ya takidak maka küma oadokra arogo tashi maittsü. Iba tangatetba nung arogotemi school lapoka anepalur südi. Aji oda, Nagaland nung talisa Catholic arogoi lapokba school kanga junga aoer aser ano Baptist arogotemi lapokba school-tema tamalen dang nungibo ano tangsa tajungba aoba angur. Iba ama arogoi lapokba school junga ooya angudang, government-i arogo nemang government school-tem ya anepaludaktsü nungbo jungla ta bilemer. Tanü Naga nunger tanurtem asoshi kanga tia majung kaji, government school nung azüngertembo sensaker aser private school nung azüngertembo takar ta tangatetba ka lir. Aji oda, Naga nunger shingaia sensaker ta mesüner, anungji makayonga maka agi takar kümer timtemseta tanurtem private school-i yoker aser government school nungbo tazünger mali tazüng toktsür. Iba tangatetbaji melenshitsüsa yakta government-i sentong ka meyanglura government school-tem ayuba ya amajok nung rongsen lalur asütsü. Atangji, tanga school-tem Education Committee ajanga reprangdaktsür saka majunger, anungji majungba sentong ka maneni moudaktsüi yakta sentong tajungba kati melenadoktsüla. Naga nunger rongnungsa süaka ita sen achir mesüra business mapa junga inyakertem atemabo government school ajung-majungba atemaji kecha balaka masü kechiyong parnok chirnurtembo fee shitak agütsüteta private school nung azüngtsü. Ajisüaka, temeimtsükaji  Nagaland nung ita sena machir, bushiness-a meinyaker, alua junga meyimtetter, ayangdaka junga mangur ta asüba kibongtem aika lir. Item kibongtem nung chinurtemji government school-ia meyokner aser private schook-ia meyoktetter ta tetsüngda nung tangar danga meshitet timtem tulu ajurudagi . Item kibongtem nungi adokba tanurtemji school junga mezüngtetter aser iba jagi teti jashia alir, anungji nisung tamajung kümadoker. Ibajibo government tebilemtsü dang masü saka arogo asoshia tebilemtsü tuluka akümer. Iba ama tensa tia koba agi tanur aser lanur taküm raksadaktsür aser kibong tajung madokdaktsür, item tebilemtsütem yabo arogoia government den lemsateptsüla ta bilemer. Arogo nungerji yimten nung senso tajung kaka lir, anungji arogoi yimten mapa shitak odaktsütsüba nung nübo, shisatsü aser sarasadem agi nungittsübaji kanga nüngdaker. Atangji, Nagaland nung aliba government school ajakbo khen nung arogo nem anepalu mesüdaktsütsüa akok, saka arogo (private) school lapoka akadak aliba government school-temji arogo school denji lokteptsüa akok aser government tesayurtemjibo government tesayursa asütsü saka arogo school nungji sayutsü. Ibaji tang private school nung government-i Hindi tesayur agütsüba amai asütsü. Iba jagi arogo (private) school-tem teyari tuluka angutsü, anungji admission aser tuition fee ajemtsü. Ano, nüngdak süra kanga sensaker kibongtem nungi aruba kaketshirtem karbo angati dang azüngtsü aser parnok nemji tang agütsüba amai angati tazüngtsü kaket aser uniform agütsütsü. Iba amai mesüka Nagaland government-i government school ajungtsü atema temelenshi sentong ka lateta meinyakra, tesayurtem tajung shimyonga tamajung kümadoktsü aser school education nung ketdangsertem ochishia inyaknüyonga meinyaktettsü. Aji oda, Nagaland yanglushiba mapa nung school education department inyakyim tama yaktasa melenshitsü rongdak nüngdak reprangtetter.