Muslim nungerji vote bank ama mezüngshitsüla: PM Modi

Kozhikode, September 25 (Agencies):  Tanü Kozhikode, Kerala nung Pandit Deendayal Upadhyaya sor küm 100 ajungba benjungmung nung jembidang Ato kilonser, Narendra Modi-i, Muslim nungertemji vote bank ama mezüngshitsüla, ta ashi.
Modi-i ashiba agi, küm 50 tejaklen Deendayal Upadhyaya-i, ‘Muslim nunger nem sempet tagütsü, Muslim nunger temerenshi, (saka) parnok nem tashi agüjang’, ta jembia liasü.
“Deendayal Upadhyaya-i, Muslim nungerji vote atema merangloktsüla mesüra ajemzüka mereprangtsüla, parnokji kasa züngshitsüla ta jembi,” ta Modi-i ashi.
Ato kilonseri, ”Ajak den külemi, Ajak atema terenlok’ ji sorkar nükjidong lir, ta metetdaktsü.
“Tanübo nisungtemi alima tatsükba akümba indang jembir, saka tamalen Deendayal Upadhyaya-ibo, asenoki asen ali rongsentem akhümtsübutsüla ta jembia liasü,” ta Modi-i ashi.
“Ozü party (BJP) ya sensakertem atema tentet, aser tanü onoki mapatong ajakji tepetzük tia nung alirtem dak rangloker inyaker,” ta Modi-isa ashi.
BJP tenüngsanga paisa, “Tanga party tem nung nisung tajungertem alitsüa akok, saka parnok dang nungibo onok nisungtem tajungba lir. Onok tanü iba jenjang nung aliba ya ozü lenir taintem ajungba ajanga lir,” ta ashi.
Elections dak sentakba nung pai, “Asen linük nung election agiba inyakyim melentsü  atema o lemteptsü nüngdak,” ta ashi.