Russia o China na den sentakteptsü jangrar: Duterte

Manila, September 26 (Agencies): Philippines Tir, Rodrigo Duterte-i Russia aser China na semdanga, par linük ana den tesendaktep junga yanglutsü sentong renemba olen ka tanü, Hombar nü sangoktsüogo.

Rusia aser China na ya US anemer tongti linük ana lir aser Philippines o US na tsüngda tesendaktep mejungi akümba mapang ka nung par Philippines tashi ita alitsü nükjidong nung Duterte-i tan alima tashi abener linük ana denji sentakteptsü alizüng ayur lir.

South China Sea (SCS) den sentakba mangatettep ken o adoka liaka, pai China mapang shia semdangtsü sentong renemba osang ka Duterte-i taoba hopta metetdakja liasü.

SCS ken o bentettsütsü atema Philippines-i UN okadak SCS ken o benok aser UN okadaki iba ken o angdangba sülen SCS tesem tulubaka par kija meyong ta züngshitsü temeten China nem agüja mali ta ita 2 tejaklen o bendang agütsü.

Ajisüaka, UN okadaki agütsüba o bendang magizüktsü lemtetba osang ka China-ia metetdaktsüogo.

China-i küm nung dollar sen billion 5 dak tema jenjang aketba shishilembatsü osettsüset abenba rongtem süidak, SCS tesem tulubaka par meyong ta züngshir aser iba ajanga kidangsüa aliba Brunei, Malaysia, Philippines, Taiwan aser Vietnam linüktem den mangatettep ken o adoka lir.

“Ni ozü Philippines madak taoba mapang yimsü asür, US den tesendaktep raksatsü mulunga mali. Ajisüaka, ozü Philippines-i Chinaaser Russia linük dena tesendaktep junga ayutsü jangrar. Russia Ato Kilonser, Dmitry Medvedev-ia kü den ajuruteptsü jangrarba osang metetdaktsüogo,” ta Duterte-i nenshia ashi.

Duterte-i Philippines Tir menden benokba sülen par linük aser US na tsüngda tesendaktep taoba mapang nungi tang tamajungba kümogo.

Duterte-i meinyaktettsü o tulu jembizüka yokba den pai aniba Philippines sorkari ozüng alema mozü mora achir aser shibelener anema raratsüren nung ozüng alema inyaktsü tenzükba yong shishilembartemi par linük shishilembatsü arendakba osanga angazükogo.

Duterte-i US anemtsü tenzük aka, par mitkartemi taruba October ita tetenzüklen teloktep mitkar terenemshitsü sentong agitsü renema lir.