Pankaj Kumar-i  Trainers Workshop lapoktsü

Dimapur, September 26 (TYO): DoPT-i teyari agüja September 26, 2016 nü Multipurpose Hall ATI, Kohima nung “Training of Trainers Workshop for Induction Training Program” agi.

Iba sentong nung tongti tesemdangerji Chief Secretary, Pankaj Kumar, IAS liasü aser tetushi süa jaokerji Joint Secretary, Ministry of Personnel, Public Grievances & Pensions, GoI,  Jishnu Barua, IAS liasü.

State sorkari department tem training agiba mapa junga dang inyaka arudar saka ano teinyaktsü aika lir. Nagaland state indang Training Policy tang teyangludak lir aser kobi melii cabinet dangi abentsü. Iba Training Policy ji agizüka mapa küma inyaktsü imlar, ta Pankaj Kumar, IAS-i o jembidang ashi.

Nagaland nung in-service training maliba atema sasar aser NCS o Allied services atema dang masü saka Technical Services atema state nung in-service training alitsü nüngdaker. Taruba ita ana tashi nung training document agizüka amshitettsü teimla lir, ta paisa shisem.

Sentong nung Jishnu Barua-ia o jembidang, training mezüngbuba shilem nung nisung aika adenba atema tenüngsang agütsü.

Anogo ananü training agiba nung tajangzük alitsü aser maneni ATI, Nagaland den yariteptsü, ta Jishnu-isa metetdaktsü.

Sentong nung shisalen agütsürtemji Director DoPT, V.K. Sinha aser Director Learning Resource Centre, DoPT, Seema Srivastava na liasü.

Iba training nung mendenji Secretary, Co-Operation Department aser Director, ATI, Lithrongla G. Chishi, IAS liasü aser Joint Director (PA), ATI, L. Youdang Jamir-i anküp tepela o jembi.