KHRISTIAN  YIMSÜ  NUNGI  SATAN  YIMSÜ DANGI

–     N. IMTATSÜNG IMCHEN

(Maneni yashi adok nungi…)

Arogo nung toklang tenzükertem ajurutepdang mezüngbuba okila  ita sen kwi angur ta asüba olen tongtipangtiba kümdaktsür. Arogotem ajak nung nübutemi Sannükerji kiboksem arudaktsüner aser tekülem kidang melemsateptetba tebilemtsütem lemsatepnüa kanga ajurutepner,saka Pastorji kodanga-a mazünger,iba jagi sarasadem  committee/Evangelistic committee dang shimmer kiboksem yoker.Asü-ama,shirangshiko,koda-masü timtem Arogopur rongnung ajurudang Pastori item ajakji meteta alitsüba sür-nung item osang ashitsü Pastor bushia  tajai yoka-a tasüba osang ashir. Pulpit nungi tajungtiba sobur meraketa jembibaji dang teperi ta bilemer,saka kibok nung santem koba tia  nung lir aji karbosa kümzüktsü ta temulung nung shia-shia mebilemer. Khenyongi tebilemtsü kecha maka-a.Aji-asünung joko Yisu Khrista dak amangba pur kibong nung koda masü timtem ajurudang Arogo sannüker nem sarasademdaktsütsü melena,ara-sener/shiteter-ang aser satan ain aketer bushia oa parnoki anepaludaktsür. Tsüngrem tenzükertem ali-rongsen,konang-nüngsang dang bushitepdang Kibuba Khristai sayuba wadang samadaktsüogo,kanga tesasatsü ka nemjema bilemer. Pastori anir Tsüngrem tenzükertem asen nüburtemi asenok sarasadem menüngdaki  tanga nisung  shiteter-ang bushia aoba ya  jashia mebilemer  noh ?

3)  AO KIN-I  SATAN  YIMSü AGIZüKOGO.

Naga lima nung mojing külemertem/satanic-worshipper lir ta tesüngmangtsü ka jembia angashiba, tanü joko asangsang nung asen Ao lima nung ibai jungkai adokogo. Iba satanic mapa inyakertem rongnung lenirji asen Aortem lir. Mezüng Naga lima ajunga nung Khristan yimsü  agizükertemi ano Mojing yimsü-a mezüngbuba nung Ao kini agizükogo.Tsüngrem yimli anasa lir ta sangoktsütsü nangzükba, joko meyiper mojing yimli anasa lir, mojing yimli ana nung lir ta sangoktsütsüsa kümogo.Osang tejangja angashiba agi iba  mojing/satan  yimsü nung tongti shilem agirtemji Aortem lir, aser parnok lenisüba nung kanga dang takok ngua bener aoba osang lir. Asen Ao kin ya kechi atakatem? Satanic yimsü nung tongti shilem agir Aor chanutemji Khristan kibong tajung nungi adokba chirnurtem masü nah ? Ao Arogotem nung revival/asentenshi/retreat/seminar sentong onsara agiba agi lakteter joko mojing/satan yimsü bushii-ang aor ?Yisu Khrista dak amangba yimsü ya Ao kin asoshi mapet asü koda ? Naga lima ajunga nung Aortem rongnung revival sayutsüngir onsara adokba ajanga satan yimsü dangi meyiper?Arogo aika nung küm noklangzüng ajungba/centenary-mong agiba temoatsü melena mojing yimsü-ang agizüker.Tawa küm-tentenzüklen January ita 2016,Khutak prayer centre Khanimu (Longjang) asentenshi sentong tulu alidang item satan külemertem telok ka arua iba asentenshi sentong-nungji aden aser iba sentongji raksatsütsü merangba osang tejangja tatalokba lir.Tetamatsü/tansütsü otsü tejangja iba mapangji atalok. Ashiba agi, iba satanic worshipper rongnungji tongti lenirtemji asenok Aor/Aortsürtem lenisüba nung iba satanic mapaji kanga dang meranga inyakba aser ibaji nisung ajaki meteta jungkai adokogo.Yisu Khrista dak amang-amanga ‘satan yimsü dangi mayipogo’.Tsüngremer temoatsü, temeim aser yimlibilem toktsür  satan yimsüang tajungba ta  shimteta  melenshibaji Ao kin kümogo.Tsüngremer kidang/ tenla kidang külemba agi lakteter joko lokti tentet onsara ka kümer tenla ki azüng-azünga  kümogo.Prayer center-a ta, International,national tenüng amer lokti tentet onsara-ka kümer  kolen kolen-ang  mashir-ah! Shir teloki aniba shitak asütsü-ar jungjunga bilemdangdi. Tamangba yimsü nung lokti tentet onsara ka metsüksar/meyoktepba ajanga satan yimsü-ang agizüker alitsü.Joko  satan Yimsü tali tali züindakjang ta asen limanung yimyim ayimoktsütsüsa  kümogo.

OTEM : Mapa meteni tepang kisüng agi jembirtemji asenok Aortem lir.Nükmerem,jabujari, memeshiba mapa jenti inyaktetbaji asenoki inyaker.Tangsa takar kümnüba nüburtemji Ao kin lir.Sorkar nungi pei lima yimtsüng asoshi terenlok (development) aruba ajak pei  yangko/juli asüngtsü bilemertemji asenok lir. Jila-a(town) ajak nung kiojen tajungtem longru ki tesüngmangtsü ka menokteta alibaji ochishia bendenba rongsen agi yanglubatem masü. Ao kin ta masü, tanü ajung kisüng dang asaba kin ta ajatsü kanga langa kümogo.Tangar kin dak alakteta majungbaji asenok ya lir. Ojang dang raksadi.