Kohima: James Basnet-i ‘Refresh Tour’ mapatong tenzükogo

Kohima, September 27 (TYO): International gospel music sempet agizüker, James Basnet-i par ‘Refresh Tour’ mapatong tenzüka, Kohima aser Kohima temeket nung tentetba kaketrejutem semdanga senzüogo.

“James aser par teloki Chandmari Higher Secondary School, Northfield Higher Secondary School, Baptist High, Mezhür Higher Secondary School semdangogo aser tarutsü nung Dainty Buds, St. Mary’s, Ministers Hill Baptist HSS aser Corragio nunger densema, kaketreju jenti semdangtsü sentong lir,” ta James’er telok nung keyboard atemla, Imlinaro Basnet-i tanü sangdong ka ajanga sangoktsü.

James-i tan kaketreju balala semdangdang pa taküm kuli lemsatepba den külemi, par kensep tasenba, ‘Refresh’ nung densemba ken tena kaketshirtem ajungshiba osang angazükogo.

“Tsüngremi nisung shia meimer ta lemsatepba den külemi, kaketshirtemi par mangdang mesamadaktsütsü asoshi James-i kaketshirtem ayongzüka liasü,” ta Imlinaro-i metetdaktsü.

Par teloki Nagaland ajunga nung kaketreju aser arogotem semdanga, Tsüngrem osang lemsatepa senzüba sülen par international tour mapatong tenzüktsü sentong lir.