Tamil Nadu nem anogo 3 nü tzü agüjang: SC

New Delhi, September 27 (Agencies): Mongolbarnü Supreme Court-i Karnataka state dang, Tamil Nadu nem anogo asemnü nung tzü cusecs 6000 agüjang, ta tuyuogo.

“India ama federal inyakyim linük ka nung stete shingaia Supreme Court tetuyuba mangatsü, ta ashitsü makok,” ta linük nung temaba court-i ashi.

Attorney general Mukul Rohatgi-i court dang, taruba anogo ana tsüngda Centre-i Tamil Nadu aser Karnataka chief minister ana jaoka senden mena iba onük bentettsü merangtsü, ta metetdaktsü.

Centre-i Jayalalithaa aser Siddaramaiah na jaoka senden amentsü atema SC-i melaogo aser Hokolbarnü parnok nem osang agüjang ta tuyuogo.

Tamil Nadu-i Supreme Court dang, Cauvery ayongtzü lemsatepba nung tatem makai ozüng yangluba agi lakogo, ta ashi.

Tamil Nadu-isa, Karnataka state-i tetsükdaktsü agütsüba aser tekong merangba ajanga mapangmapang shia iba tensa ya ajurur, ta ashi.

Supreme Court-ia, “Karnataka Assembly-i Tamil Nadu nem Cauvery ayongtzü magütsütsü ta bangzüng renembaji onoki magizüktsü,” ta ashi.

Obendangertemi Karnataka atema okatsür, Fali Nariman dang, “Chief minister Siddaramaiah dang Supreme Court tetuyubaji angatsüla ta shiang,” ta shiokogo.

Yashi Karnataka sorkari shidi ka ajanga Supreme Court dang, Bengaluru densema state nung aliba yimtitem nem agütsütsüsa tzü peria maliba ajanga Supreme Court-i tuyuba ama meinyakteter, anungji September 20 nü state dang Tamil Nadu nem anogoshia Cauvery ayongtzü cusecs 6,000 agüjang ta tuyubaji meyipa reprangshidaktsüner, ta  mepishia liasü.