Trump o Clinton nati rongsenren onük benoka olemtep

New York, September 27 (Agencies): US Tir menden atema tokteper, Democratic yimtenren telok nungi candidate, Hillary Clinton aser Republican telok nungi candidate, Donald Trump nati Tir election den sentaktepa agiba olemteptsü sentong nung rongsenren aser America-i bendanglen tongti shilem agiba den sentakba onük benoka yasüng, Hombar aonung olemtepogo.

“Clinton-i US Tir menden abentsü tashi ngua mali aser lai taoba mapang lenisütsü menden abendang mapatong balala benokba ajanga America linüki tebilemtsü khuret aser tetsüdaktsü jenti ajuruogo,” ta Trump-i sangoktsü.

“Trump-i tekübokba jenjang nung alir nüburtem züdoka toktsür takatait nisungtem ang sapua, par rongsenren mapatong benoktsü sentong lir. Ano, pai alima dang sayuba ama pa kaaita maliba mesüra pai langka miimbanga ayutsü merangba yong pai sorkar nem saru agütsüba den sentakba osang yimjak nung metetdaktsütsü memulungi lir. Anungji, America nüburtemi pa Tir shimra, asen Americalinüki tarutsü anogotem nung tetsükdaktsü aser khuret jenti ajurutsü,” ta Clinton-ia ashi.

Taküm November ita 8 nü agitsü renemba Tir election agiba jakdang Tir menden atema tokteper candidate ana tsüngda agitsü asoshi ayongba olemteptsü sentong 3 rong nung yasüng agiba sentongji mezüngbuba sentong lir.

Clinton-i US Tir, Barack Obama-i Tir menden mezüngbuba kümsük abendang, US Secretary of State inyaka, alima linük 100 dak tema tsüngdong semdanga tajangshibatem ajangzükba aser mangatettep adoka alir mesüra tongpang rara alir teloktem rong nung yimjung tezüngzüktep takok ngua agidaktsüba olena lemsatepa liasü.

“Clinton-i tesüiba mapang tajangshiba jenti ajangshia lir saka item ajakji tajangshiba tamajung dang lir,” ta shia, US-i tanüngba alima tashi abener linüktem den aroki lungjemer Iran linük den yaküm nuclear tezüngzüktep agiba maparen aitsüba olen ka Trump-i metetdaktsü.

Ajisüaka, Iran den nuclear tezüngzüktep agiba ajanga Iran-i tongpang nung amshitsü osettsüset yanglutsü aser kasaji rizüngtsü maparen takok ngua anendaktsü ta Clinton-i telangzüba agütsü.

Nübur aser police na tsüngda temulung lemtep tanaben lidaktsütsü atema ozüng alema inyaker den sentakba temzüng ozüng tajungba küma yanglushitsü onük Clinton-i benok saka tarutsü anogotem nung police nem tashi tuluba agütsütsü bilemba olen ka Trump-i metetdakja liasü.

Ajisüaka, tenaprongi bendanglen nungi ozüng alema US cyber amakba maparen inyakba nokdangtsü atema tang dang nungi tesashiba inyaktsü atema bangjemba osang jangjaogo.

Clinton aser Trump na tsüngda tanabuba olemtep sentong taruba October ita 9 nü agitsü aser tena den yariteper, Democrat Tim Kaine aser Republican Mike Pence na tsüngda olemtep sentong ken dang agitsü aser iba sentongji October ita 4 nü agitsü renema lir.