Naga nungertemi tourism ajungkettsüla : Merentoshi

Kohima, September 27 (TYO) : Alima den liromedema Nagaland nunga tanü World Tourism Day ayongzüka amung aser iba anogo nung teyari balaka nüngdakba nisungtem jenjang ajungkettsü tayongzükba agütsü.

“Tourism Department indang tebilemtsü khuretji teyari balaka nüngdakertem indang nüngdak peritsütsü atema asütsüla” ta tanü sentong nung Advisor to Chief Minister & MLA, Merentoshi R. Jamir-i ayongzüka jembi.

Rongsen jenjang ajungkettsü atema industry tulutibaji tourism lir aser Nagaland nung eco-tourism inyaktsü lenmang sadema lapoka lir, ta pai ashi.

Asenoki five-star treatment agütsütsü melena rural tourism nung temulung agütsütsüla aser asenok Naga nungertemi tourist tem den sadoka mungtettsü atema yimya tajung sayuba den chiyungtsü tajung aser metsümeshidak temerük agütsütsü merangtsüla, ta Merentoshi-isa ashi.

Nagaland nung Tourism department-i tourist amenity centre aika lapoka aoba atema paisa tenüngsang agütsü, saka RCC ki yangluba amenity centres tazüng ayuba atema sasa bilemba olen ka shisem.

Ano, Tourism Department-i Naga Heritage Village ji ‘Plastic Free Zone’ ka ta sangoktsüba atema Merentoshi-i tenüngsang agütsü aser iba ya Hornbill benjung nung dang masü saka küm piyong mapa küma inyaka aotsüla ta paisa ayongzük.

“Nagaland Hotels Limited (NHL) ya Nagaland Industrial Development Corporation (NIDC) kübok aliba nungi Tourism Department kübok ayutsü atema yashi state cabinet senden nung telemtetba agiogo,” ta Merentoshi-isa tanü metetdaktsü.

Sentong nung Nagaland Secretary for Tourism, Angau I. Thou-ia Department aser Nagaland Tourism Association dang social tourism nung temulung agütsütsü ayongzük.

“Asenoki telemsa kecha melii nisung ajak kasa ta agizüktsüla. Nisung ajak nem tourism temeten agütsütsüla aser asenoki aseni inyakba maparen ajanga iba temeten ajungkettsüla” ta Angau I. Thou-isa shisem.

Tanü agiba sentong nung NTA aser Nagaland Hotels and Restaurant Associations nungi teshimtet nübotemi parnoki ajangshia aruba osang lemsatep aser külen Tourism Department-i hotels aser care homes asoshi wheel chairs lema agütsü.

Sentong nung mendenji Additional Director (HoD) Tourism, K T Thomas liasü, Kenei-i temoatsü meshia sarasadem aser Deputy Director, Akhale V. Khamo-i anküp tepela o jembi.

Ano külen, Nagaland Tourism Logo tetoktepba atema tetendangertemi ashiba agi nisung 11 shimtetogo aser parnok tsüngda final tetoktepba alitsü.