Social Welfare Supervisor temi mener lungkak aitba anen

STATE SORKARI SERVICE RULES MEYIPA REPRANGSHITSÜ NANGZÜK

Kohima, September 27 (TYO) : Sorkari Social Welfare Department indang Service Rules reprangshimtsü ta nangzükba sülen, All Nagaland Social Welfare Field Staff Employees Association-i tanü nikongtsütsü lungkak aitba sentong anena atatsü telemtetba agi.

Tanep Social Welfare Department kübok supervisor 150 shi Directorate of Social Welfare nung lungkak aittsü tenzük.

State sorkari service rules yanglushitsü ta nangzükba ama meinyakba atema tejashi sayua district balala nungi supervisor tem adenshia lungkak ait. Parnoki All Nagaland Social Welfare Field Staff Employees Association kübok lungkak aitba sentong agi.

“Küm 20 inyaker aser maneni züngdar, service rules kong lir”, “Onok nem promotion agüjang”, “Sorkar indang tongshi tongtipangbaji temeten atema ketdangsüba lir”, “Kechiba nisung kar tashi ajanga tangar aika indang temeten sota ayur?”, “Kodang nübortemi sorkar tsübudir, pei mulungba nung ketdangsüba adoker; saka kodang sorkar nübortem tsübudir, temulung sadoker” ta parnoki tezülubatem amer lungkak ait.

Department nung supervisor temji NPSC ajanga shimoker saka parnok mapang shitak nung promotion mangur aser küm 20 tashi service inyaka aruyonga tajangzük kecha  magütsür, ta Association president Benjamin aser general secretary Chotangse Anar nati tanü osangbener dang ashi.

Tanga amai dang ora, NPSC ajanga shimba supervisor aika promotion mongui dang mapa nungi anisüngzüktsüsa akümtsü. Iba dak sendakba nung Association-i sorkar nem aiben tezüluba nung tebilembatem lemsatepogo saka itemji agizüka mapa meinyak, ta tenatisa ashi.

Ano külen, yimten tsütsü nungi aser ano tanga tim masüba mapatem inyaker. Department nung Minister, Parliamentary Secretary aser tongti ketdangser kari pei chirnurtem Child Development Project Officers ama contract basis nung shima inyakdaktsür, ta ANSWFSEA mendenpurtemisa metetdaktsü.

Nagaland nung CDPO menden 60 lir saka tang CDPO 63 lir aser parnok rongnung ozüng alema shimertem dena lir. Department nung backdoor appointments aika lir aser Social Welfare Department ketdangser anati 2013 küm, tena indang jabaso ana CDPO mapa ung shimok aser tenati mapaji regularize asütsü atema inyakdar, ta parnokisa shisem.

“Ozüng alema shimokba ajanga Nagaland nung supervisor 150 den tema temeten monguteti lir. Iba onük atema Chief Minister aser Chief Secretary nati Social Welfare Department indang service rule reprangshimtsüla. Iba takhangba magizükra, onoki asüng nungi lumia lungkak aittsü aser Directorate of Social Welfare mokdangtsü,” ta ANSWFSEA mendenpurtemi metetdaktsü.

Social Welfare Department Minister, Kiyanielie-i lungkak aitertem den ajurutep aser taruba cabinet senden nung service rules yanglushitsü indang onük benoktsü ta nangzük, ta osang ka ajanga ashi.