SAARC züngsem aikati Pakistan nung senden thinentsür

New Delhi, September 28 (Agencies): India dak alia Afghanistan, Bangladesh aser Bhutan linüktemia taküm November ita Pakistanyimtiba, Islamabad nung ayonga aliba SAARC Summit nung madentsü thinentsüogo.

Tawa kiralongrartemi Uri amakba sülen yasüng ayaterm nung India-i Pakistan nung ayongba senden nung madentsü atema telemtetba agiogo.

Iba dak sentakba nung Bangladesh-i, linük kati linük telung inyakyim nung amoshiba ajanga SAARC senden ayongtsü metemsüi kümogo ta ashi, aser Afghanistan-ia tesem nung kiralongraba ajanga iba senden nung madentsü lemtet ta metetdaktsü.

“SAARC inyakyim ketdangser ka ama Bangladesh-i tesem nung amalitep, tesentaktep aser tongtepratep alitsü tangatetba lir, ajisüaka itemji tensa junga ali nungang inyaktet. Item kuli nung ajemdaker Islamabad nung ayonga aliba senden nung Bangladesh-i shilem magitettsü,” ta ashi.

Afghanistan-ia SAARC Chair, Nepal dang Tir, Mohammad Ashraf Ghani-i iba senden nung medentettsü ta metetdaktsüogo.

“Afghanistan nung kiralongraba aliba ajanga rara tali akumer. Tir Ghani-i pa Commander-in-Chief ka ama pa teinyaktsü mapatem nung mazüngi alitsü, anungji senden nungji medentettsü,” ta par linük sangdong ka ajanga metetdaktsü.

Ano külen Bhutan-ia, SAARC inyakyim aser tesem nung amalitep atema inyaktsü, ajisüaka tawa tesem nung kiralongraba atema tebilemtsü akar, koba ajanga November 2016 nung 19buba SAARC senden Islamabad nung takok angutsüsa tensa ka mali,” ta ashi.

“Iba dak alia Royal Government of Bhutan-i SAARC linük kar nung kiralongraba ajanga yimjung aser security tensa raksaba tebilemtsü lemsateper, aser parnok den külemi SAARC senden nung shilem magitettsü,” ta Bhutan-isa ashi.

SAARC nung züngsem linük ti lir aser India den linük asemi iba senden nung medentettsü ta sangdongba ajanga iba senden malitsüsa kümogo, kechiyong SAARC inyakyim nung züngsem linük ka nungi tekolak ka danga mali nungbo iba senden akatsü makok.

Tawa J&K, Uri nung army 18 tepsetba sülen India-i Pakistan den tezüngzüktep yanglua aliba  Indus Water Treaty (IWT) reprangshia telemtetba kar agiogo, iba den külemi Pakistan nem MFN jenjang agüja aliba reprangshitsü atema telemtetba agiogo.

Yashi Indian Foreign Secretary-ia Pakistan High Commissioner to India, Abdul Basit nem Pakistan tsütsü nungi kiralongraba kuli agütsüogo.