Summery Revision of Electoral Rolls 2017 atema senden amen

Dimapur, September 28 (TYO) : September 27, 2016 nü Hotel Japfu Kohima nung State Political party tem den Special Summery Revision Electoral Rolls 2017 indang senden ka amen.

Senden nung Chief Electoral Officer, Sanjay Kumar, IAS-i ashiba agi, Summery Revision of E-Roll ua ozüng ajanga tuyua inyakba mapa ka lir aser iba inyaktsü atema mapa latetja lir.

Election Commission kübok iba ya kanga dang tongtipang mapa ka lir aser iba ajanga candidate tem indang tia yanglutsü. Nagaland nung vote agütsür lakh 11 ser meyirjang 20 shi aliba nungi lakh 4-bo bogus lir. Electoral rolls merüktettsü atema Election department-i bangdakpur aser nisung telok balala den ajurutepa sendentem amener, ta Sanjay Kumar-isa metetdaktsü.

Special Summery Revision mapaten takok ngua inyaktsü atema yimtenren telok ajaki yariteptsü, shilem agitsü aser pusema nungittsü mepishir, ta paisa ashi.

E-Roll nung arishi küm 18 ser temapurtem ajak tenüng züluoktsü akok aser iba nung matamabensartem dena lir. Nisung kar ano mezüluoki lira, BLOs-i iba asoshi mapa inyaktsü, ta Dy. CEO, Vekho Vero-ia senden nung metetdaktsü.

Senden nung ACEO, Awa Lorin-ia Special Summery Revision indang osang tejangja metetdaktsüdang, iba ya Commission-i küm shia inyaker aser iba mapang E-roll update asür, ta ashi.

October 1, 2016 nü Hotel Japfu Kohima nung State level launching ceremony agitsü, ta paisa shisem.

Senden nung mendenji Dy. CEO, Khekugha Sema liasü aser Povotso Lohe, State Executive züngsemtem, taoba State President, NCP; Vanthungo Odyuo, State Secretary NCP; Achumbemo Kikon, Convenor Legal cell, NPF nungertema senden nung aden.