Planning Commission agienba ajanga Arla 371 nung timtem ajurutsü

Dimapur, September 28 (TYO): Bodbarnü Congress Bhavan, Kohima indang Conference Hall nung NPCC General Session ka agiogo.

Iba sentong nung Secretary, AICC, I/C Nagaland, Dr. K. Jayakumar-i o jembidang ashiba agi, Planning Commission agienba ajanga Arla 371 nung Nagaland asoshi alakteta onük kar enoka aliba nung tetsükdaktsü ajurutsü.

Arla 371 nung lateta aliba onüktem nung ajemdaker Planning Commission-i senotsü lemzükja liasü, ta pai ashi.

Nitti Ayog dak senotsü lemzüktsütsü atema tashi kecha mali aser iba ya PM Modi-i rongsenren madak ketdangsütsü atema hadir ka ama lir. RSS-i tetuyuba agütsüba nung ajemdaker Modi-i senotsü lemsatsütsü, ta Dr. K. Jayakumar-isa shisem.

Iba inyakyim ajanga Arunachal Pradesh nung ita ka tsüngda Congress-i sorkar anaben tashi akoksatsüsa aküm. Union Minister Nitin Gadkari-i Chief Minister Pema Khandu dang tang teinyakdak mapatong atema senotsü ajak agientsü ta ashi. Iba sülen anogo asemnü lir külen, Union Minister of State for Chemicals and fertilizers-i Arunachal semdangdang Khandu den ajurutep aser state-i nüngdakba senotsü agütsütsü atema BJP nung adentsü mesüzük, ta Congress lenirisa BJP aija metetdaktsü.

Iba jagi Khandu-i Congress sorkar songjen PPA den adentsü telemtetba agi. Tanga Chief Minister temia kasa timtem ajuruya alitsü, anungji Centre nung Congress sorkar arura, Linük Temzüng nung Northeast aser nübo agi tangar memenepertem atema ‘special provisions’ kümzüka ayutsü, ta  pai ashi.

Modi-i senso shia indang bank account nung sen lakh ter pungugu enoktsütsü ta nangzüker meinyakba atema Dr. Jayakumar-isa ashiba agi, “Iba ya alima nung tiyazü jembiba onük tulutiba lir.”

Modi-i RSS indang tangatetbatem prokshiba ajanga linük raksatsütsü aser Centre nung Congress sorkar marura, Uniform Code benoka RSS sobalibaji linük nung senso ajak nem benshidaktsütsü akok, ta Dr. Jayakumar-isa shisem.

Sentong nung NPCC President K. Therie-i tesentepertem pelashishia agizük aser NPCC indang maparen osang metetdaktsü.

1. Therie-i NPCC Roadmap indang onük jembidang “DCC temi anir party nung züngsem ajaki nübortem dang Congress indang mangdang metetdaktsütsü merangang” ta tayongzükba agütsü.

Iba sentong nung NPCC Vice President, Khriedi Theünuo-i ‘Special provisions with respect to Nagaland’ onük jembi, AIMCC Gen Secy, I/c NE, Jarjum Ete-ia la INC nung züngsemer mapa inyaka arudang ajangshiba osang kar lemsatep aser Manipur Pradesh Mahila Congree Committee President, Loitongbam Tilottama-i tetsürtem asoshi menden lemzüktsüba atema pelaba metetdaktsü.

Tanü agiba General Session nung mendenji NPCC Working President, Ayang Aonok liasü, Chiechama Baptist Church Associate Pastor, Thejalhousa Theünuo-i temoatsü meshia sarasadem, KDCC-i ken ka aten aser NPCC Gen Secy, Dokiu Kecham-i anküp tepela o jembi.

General Session tembangba sülen ‘Clean Election’ indang shisdokten ka lir aser iba nung onirji NPCC Gen Secy, Jonathan Ao liasü. aser Dr. K. Jayakumar, K. Therie o Kalühol Tase nungertemi o jembir.