DiCaprio aser Nina Agdal na miima kibong akümtsü sentong yanglur

Los Angeles, September 29, 2016 : Actor Leonardo DiCaprio o model Nina Agdal na tang temedemdak lir aser tena taruba küm kibong akümtsü sentong lir, ta osang kar ajanga ashi.

Osang ajangasa ashiba agi, “DiCaprio aser Agdal na kiyim sentong shinga nema memetetdaktsütsü.”

“Leonardo-i tetsür aika den medema aruba sülen, pai aginüba tetsürji Agdal lir ta telemtetba agiogo,” ta Life & Style magazine-i metetdaktsü.

“Nina Agdal-i aniasüng asü masü kecha balaka mebilemi tena kiyim sentong St. Barts mesüra iba anasa aliba nija asetkong ka nung agitsü atema sentong yangludar,” ta kasa osang ajanga ashidang, Leonardo DiCaprio-i iba kiyim mapang takok tashi tzü mopung memenentsüsa aginer ta ashiba dena metetdaktsü.

“Tena kiyim sentong timba ka DiCaprio-i acha ayanger saka pai Nina aginüba aser nüngdakba tem dena ataloktsür,” ta osang ajangsa ashi.

Tesüiba mapang DiCaprio medema aruba tetsürtemji Gisele Bundchen, Bar Refaeli, Blake Lively aser Miranda Kerr nunger lir.