Philippines nung pua aliba Indonesia nunger asem chiokogo

Manila, October 2 (Agencies) : Islamic State (IS) den tesentaktep aliba telok, Abu Sayyaf telungpuri Indonesia nunger asem ita asem rishikangshiba sülen Deobarnü chiokogo, ta Philippine sorkar-i metetdaktsü.
Tesüiba hopta ana nung chiokba zünga tang tashi nung item telungpuri pua aliba Indonesia nunger parnok nisung 9 chiokogo.
Parnok asem ya Moro National Liberation Front (MNLF) ngutetsang, Nur Misuari nem Sulu nung agütsü. MNLF ya Muslim tentet ka lir aser parnok ya tang sorkar den yimjung inyakyim ka nung sign sütepa lir. Parnok asem chiokba melena sen agi asü magiar osang ano mejangja.
Tesüiba hopta ana nung Abu Sayyaf telungpuri nisung puer oa sen meshiba mapa ajanga parnok sen aika sarudenogo. Parnoki tan Indonesia nunger asem den Philippines nunger ana aser yaküm resort ka nungi pua bener aruba Norway nunger ka ta chiokogo. Norway nungba den Canada nunger ana apubabo tekolak tangzüka südaktsüogo.
Parnok asem ya Sulu & Basilan asetkong nung aliba telungpur aritoktsü atema Armed Forces of the Philippines (AFP)-i amakba sülen chiokba lir.
Tir Rodrigo Duterte-i Abu Sayyaf telungpur nem teraksa tulu bener arutsüogo.
“Tang telungpur anokshija takok anguba ya Tir Duterte-i MNLF, sorkar tem aser AFP tem den lungjemer inyakba ajanga lir,” ta Duterte atema yimjung inyakyim nung negotiator, Jesus Dureza-i sangdong ka ajanga ashi.
Abu Sayyaf tetetzü “Noklang nok amer” aser parnok ya nükjidong ka atema tentetba lir saka tangbo security nung mongintemi parnok ya taginüba akhanger telok masü saka rakzükraktemer telok ka lir, ta ashir.
Ano item telungpur yagi Malaysia nunger 5, Philippines nunger 4, Indonesia nunger 2 aser Netherlands nunger ka ta mechioki lir.