Modi sorkari ochimashi aser black money atema inyakogo: Amit Shah

New Delhi, October 02 (Agencies): Narendra Modi sorkari ochimashi maliba sorkar ka yangertsü aser black money atema inyaktsü nangzükba ama inyakogo, ta shia tanü BJP Tir, Amit Shah-i, Income declaration scheme kübok sen crore 65,000 anguba atema tenüngsang agütsü.
Amit Shah-i, küm ana ser tesadang nung sorkari black money aser India o bendanglen kiojen rongsen mesangdongi aliba nungi crore lakh 1.40 ngutetogo, aser tang tesüsa sen ngutetba ya ajanga India ajungketba tenzüker, kechiyong item senji yimtsüngtem, sensakertem, aluyimertem aser lanurtem terenlok atema amshitsü, ta ashi.
Income declaration scheme kübok nisungtemi pei rongsen crore 65,250 sorkar dang sangdongba dak sentakba nung Amit-i, “India nunger nüchiso anguba sülen linük putiotsü nung sorkar shingaia black money iba tashi yabo mengutet,” ta metetdaktsü.
“Ato kilonser, Narendra Modi-i ochimashi maliba sorkar yangertsü aser black money meyipa bener arutsü ta nangzükba ama pai mapang tatsüka tsüngda inyaktetogo,” ta BJP tongti Shah-isa ashi.
Income Declaration Scheme-2016 scheme kübok sorkari sen crore 65,250 ngutetba dak alia Income Tax department survey kübok sorkari sen crore 56,378 ngutetogo aser sen crore 1,986 puogo.
Shah-i ashiba agi, item ajak den tanga lenmangtem nungi ochimashi sen ngutetba ajak agi senteper sorkari sen lakh crore 1.40 ngutetogo.