Chuchuyimlang nung Gandhi Jayanti amung

Dimapur, October 2 (TYO) : 147 buba Gandhi Jayanti nüngtem nung Chuchuyimlang Village Council-i anogo ananü sentong ka ayongzüka agi.
Iba sentong ya yimjung, telongjem aser merükmejuba dak rangloker agi.
Nisung ajaki merükmeju aser metsümeshi timi asütsü aser tanur asüdang nungi item yimya sübatsü nükjidong nung October 1, 2016 nü community sanitation drive ka ayongzüka agi. Iba sentong nung Chuchuyimlang yimtsüng aser Chuchu jila nungi school 9 aden.
Iba sentong nungsa Mahatma Gandhi indang taküm aser tesayubatem nung ajemdaker painting competition ka ayongzüka agi.
October 2, 2016 nü Anü Mai Amphitheatre nung Chuchuyimlang Village Council-i anogo piyong sentong ka ayongzüka agi. Iba sentong nung Mahatma Gandhi-i sapuba Laishiba tekongtem aser Christian Ken tem indang tetoktepbba agi.
Tetoktepbatem nung National Institute of Electronics and Information Technology aser Mahatma Gandhi Academy of Human Development na densema school ajak nungi kaketshirtemi shilem agi.
1955 nungi Chuchuyimlang nung Gandhi Jayanti mungyonga arur. Iba küm Gandhian Padmashree Natwar Thakkar-i Chuchuyimlang nung Nagaland Gandhi Ashram lapok.
United Nations General Assembly-i 2006 küm Gandhi Jayanti ji International Year of Non-violence ta sangoktsüba mapang Chuchuyimlang nung sentong tulu ayongzüka amung.
2014 küm Chuchuyimlang Baptist Arogo nung Christian Education Department-i Gandhi Jayanti indang sentong tuluka ayongzüka amung. Iba küm nungi Village Council-i Mahatma Gandhi indang tesayubatem nung ajemdaker kümshia Gandhi Jayanti amungtsü telemtetba agi.