Mokokchung District Boxing Association tentetogo

October 1, 2016 : Mokokchung District Boxing Association (MDBA) tentetnü MDBA Senior Advisors, mena alirtem, C Tial Longkumer (Achiji), Meren Paul (Tiyong) aser Subong Longkumer (Abelen) nunger association ketdangpurtem den külemi tangokba noksa ka angur.

Mokokchung, October 02 (TYO) : September 5, 2016 tenzükba Mokokchung District Boxing Association (MDBA) mezüng official senden October 1, 2016 nü Arkong Ward, Mokokchung nung Senior Advisor, Subong Longkumer’er kidang menogo, ta MDBA tatong tir, Rongsentoshi Jamir-i sangdong ka ajanga metetdaktsü.
MDBA ya Mokokchung nung saisapong nung jangrar temulungertem, balakata Martial Arts aser tsüngteper tejenpur lungjemer tenzük. Iba telok ya saisapong jangrar lanurtem state nung dang masü saka national aser international sabangtem nunga shilem agitettsüa renemtsütsü nükjidong nung tenteter, ta sangdong ajanga ashi.
MDBA tenzükba ajanga lanurtem temang, shisatsü aser temulungjang ajak pei sasa azüoka aser anema aliba tsütsü liromedema alitsü angatetdaktsütsü. Asen lokti nung tsüngtepba ajungkettsü aser saisapong ajanga lanurtem relokdaktsütsü mechi nung iba tentet ya mapang talangka kanga junga shisadanga asadanger tenzük, ta sangdong nungsa shia lir.
Rongsentoshi-i, MDBA-i Mokokchung nung aliba lanurtem–tebur aser tetsü–dak sempetbo lir sür nung pei sasa memeteti aliba ajiteta parnok nem sabang lapoktsütsü tebilemba nung iba telok ya tentet, ta ashi.
Lanurtemi linük tenüng nung Olympic tashi nung oa shilem agitettsüsa tesayuba agütsütsü nükjidong tulu yur onoki MDBA tenzük, ta kasa sangdong nungsa shia lir.
Aruya aliba itatem nung MDBA-i tsüngtepba training angadi agütsütsü anungji ibaji atema tejangrartemi association den tongtepratepangma.
MDBA nung saisapong tsütsü ajaki jangja aliba senior citizen aser bodybuilder Subong Longkumer, asayar tejen aser tesüiba mapang bureaucrat Meren Paul aser martial asayar C Tia Longkumer nunger senior advisor tem aser entrepreneur & tsüngtepba sapur, Merang Longkumer kimen lir.
MDBA mendenputemji, Tir, Imkummeren Jamir, Tatong Tir, Rongsentoshi Jamir, Tongti Tezülur, Aolong Imchen aser Repsem tezülur, Bendangtemsu Ozukum nunger lir.