R-Day nung Abu Dhabi Prince tongti tesemdanger asütsü

New Delhi, October 02 (Agencies): 2017 küm Republic Day parade nung Abu Dhabi Crown Prince, Sheikh Mohamed bin Zayed Al Nahyan tongti tesemdanger asütsü, ta tanü External Affairs otongdar, Vikas Swarup-i metetdaktsü.
“Onoki India tembar, Abu Dhabi Crown Prince, HH Sheikh Mohamed bin Zayed Al Nahyan Republic Day 2017 tongti tesemdanger asütsü jaoker,” ta pai twitter ajanga metetdaktsü.
Shidi ka ajanga Mohamed bin Zayed-i Ato kilonser, Narendra Modi dang, “India nunger Republic Day benjungmong nung adentsü asoshi jaokba atema pelar,” ta metetdaktsü.
Shidi nungsa, “Asenok tesentaktep tashi itta alibaji putiotsü nungi tera yanga lir. Asenok mapatongtem nung terenlok alitsü asoshi asenok amalitep taliba kaogo,” ta shia lir.
UAE armed forces nung Deputy Supreme Commander ji Al Nahyan lir, aser pa jaokba ajanga shishilembaba aser security nung linük ana tesentaktep tajungba akümtsü imlar.
Ano külen kiralongraba onük nung tang India den tesentaktep mejungi aliba linük, Pakistan ya UAE den tesentaktep tajung lir.
2015 August ita nung Modi-i UAE semdangba mapang linük anapronglai alima nung linük kati ka anema tamangba yimsü tenüng nung kiralongraba mapa inyakbatem aija liasü aser kiralongraba anema külemi longjemer inyaktsü bangjemtepa liasü.
Ano shishilembaba tsütsü India atema UAE ya tongtibang linük ka lir, India shishilembaba maparen nung külemi inyaker China aser US sülenbo tasembuba linükji UAE lir.
UAE aser India na tsüngda shishilembabaji US sen billion 60 lir. Ano külen tang UAE nung India nunger million 2.6 dak tema lidagi.