Nagaland nung teintet anogomong among

Kohima, Oct 2 (TYO): Nagaland nunga alima ajak den tsüngkangmedema Honibar nü teintet anogomong mongogo. Iba anogomong nung nisung ka tain küma tantsür tambur akümdang mezüngmeshi mesüi akümtsübua amshitsü aser meima anepalutsü indang jembia liasü.
Kohima nung iba anogomong sentong ya Social Welfare department ajanga ayongzüka akaba mapang teintettem rogo purtem den lanurtema dena tetsüng agi jajaba sentong nung shilem agia liasü. Iba sentong ya Nagaland Senior Citizens’ Forum nung tir Wb. S I Toshi Ao-i tenzüktsü.
” Nisung ka tain küma tantsür tambur akümtsü tenzükba purtem ya küm 60 nungi tema purtem lir aser aiben parnok nem akümtsübu agüja tanutsü tanubu purtemi mamshir. Iba ama tantsür tambur mezüngmeshiba sobaliba tamajung ya temetetter aser memetetter lima aser loktiliba ajak nung ataloker,” ta iba sentong nung jembidang Social Welfare Department nung Secretary, Dellirose M. Sakhrie-i metetdaktsü.
” Asenoki tantsür tamburtem mezüngmeshia amshiba agi parnok mepelar aser temang junga malir, anungji asenoki parnok taküm aser shisatsüji angateta meima amshitsüla,” ta parnokisa metetdaktsü.
Teintet rogo aser tantsür tamburtemji loktiliba asoshi rongsen lir, kechiyong parnoki aika ajangshia lir aser temetetba nung parnokji takar, anungji parnokji pei pei mapa nung mapang aser küm agi tonger anenaka, parnok dak aketba shisatsü aser temetetba ajanga nübortem teyari angutsü atema parnokji amshitsüla ta laisa metetdaktsü.
Laisa ashiba agi, tang Nagaland nung Social Welfare department ajanga Old Age Pension agütsür ajak agi 51,750 lir aser ano tantsür tamburtem alitsü atema yangluba kitem Kohima, Mokokchung, Zunheboto, Phek aser Dimapur district nung kaka lir. Iba denji government mozü ki aika nung teintet rogotem asoshi OPD balala toktsür.
Iba sentong nung teintet rogo purtem tenüng nung Wb. N Theyo-i jembia liasü. Paisa külem teintet rogotem dang tangari akümtsübutsüsa pei taküm tatishitsü tajung küma alitsü ayongzük.
Iba anogomong amongba tenüng nung tantsü tambu ana nem “State level awards” konang agütsü. Tenaji ka Rev Dr L. Noksangchila aser kaji Dr C. Thridongse liasü aser ano Kohima district award angurtemji Vichü Zashümo aser Chatuo Paphino na liasü.
Iba kasa anogomong ya Deobar anogo nunga arogotem nung sentong tajung yanglua mongogo.