NSF Martyrs’ Memorial Trophy: Kigwema SU, Headwinds FC, Meriema YO aser WASU teloktem 2buba round-i iogo

Kohima, October 03 (TYO) : Angami Students’ Union-i “Goal for Peace” omen nung ajemdaker Kohima local ground nung ayongba, 17buba NSF Martyrs’ Memorial Football Tournament nung Kigwema Students Union, Headwinds Football Club, Meriema Youth Organisation aser WASU teloktem tanabuba round-i iogo.
Mezüng asaya nung Kigwema Students’ Union-i 2-0 agi Danger Football Club madak takok angu aser iba saya nung Zhazoto Sale o Shürhotolie Neihu nati minute 41 aser 63 buba nung par telok atema goal ka ka yok. Iba saya nung Kigwema SU nungi Neisalie Yhokha aser Danger Football Club nungi Abel Awomi na yellow card agi merenshi.
Tanabuba asaya nung Headwinds FC Chiechama-ia 2-0 agisa Government Polytechnic Kohima madak takok angu. Asaya tenzüker minute 3buba nung Ketsivile Rülho-i goal ka aser minute 69buba nung Vizose-u Metha-a goal ka ta yokba ajanga parnoki iba takok angu. Iba asaya nung Headwinds FC nungi Kekhrieselie Rüpreo aser Government Polytechnic nungi Chubameren na yellow card achi.
Meriema YO aser Chüziema Youth na lemzüktsüba mapang tashi asayadang goal 2-2 agi draw asüba ajanga penalty mettsütepba nung 5-4 agi Meriema YO-i takok angu.
Iba asaya nung Chüziema Youth FC nungi Seyieneituo-i minute 29buba nung mezüng goal yok aser iba sülen kasa telok nungi Menguzelie-ia minute 31buba nung goal ka yoksem. Iba sülen Meriema YO-i kanga meranga asayatsü tenzük aser minute 36buba nung par telok atema Kekhriese chiesotsu-i mezüng goal aser minute 66buba nung Vizotuolie Lhousi-ia goal ka ta yoka iba asaya kasasa nung anena penalty metsüteptsüsa aküm. Iba asaya nung Chüziema Youth FC nung Dziesevilie aser Meriema YO nungi Kevingulie na yellow card agi merenshi.
Ano asaya balaka nung WASU-i 4-0 agi Pfütseromi Youth club madak takok angu. WASU telok nungi striker Nouneneilie Medoze-i minute 56 aser 65 nung goal kaka yoka par telok atema goal ana yok. Iba jakdang Keviselie Terhüja-i minute 42buba nung aser Kikrukhrielie Kuotsu-i minute 52buba nung goal kaka yok. Iba asaya nung Pfutseromi YC nungi Thejalhou Mero yellow card agi merenshi.

OCTOBER 4, 2016 NÜ ASAYATSÜPUR YAMAI ALITSÜ:
1. NU Kohima Campus vs Dahou United, anepdang 9:30 ako
2. Ziekezou SC vs Pfosemi FC anepdang, 11:00 ako
3. P. Vizheto FC vs Tsosinyu SU, nikongdang 12:30 ako
4. Nagaland Police (Blue) vs PK United FC Viswema, nikongdang 2:00 ako