Kejriwal-i Ato kilonser Modi nem tenüngsang agütsü

New Delhi, October 03 (Agencies): Hombarnübo Delhi chief minister, Arvind Kejriwal-i Ato kilonser, Narendra Modi den tsükchitepba amadoker Modi nem tenüngsang agütsüogo.
Pakistan nung Line of Control (LoC) nung kiralongrartem tesep amaktsü atema telemtetba agiba atema Kejriwal-i Modi nem tenüngsang agütsü.
Kejriwal-i, “Onük aika nung Ato kilonser den onok tangatetba balala asütsüa akok, saka ni Modi nem tenüngsang agütsüner,” ta ashi.
“Taoba hopta asen army temi tasütait sayua Uri amakdang sepai 19 asüba mangyangogo. Ni Ato kilonser den onük 100 dak tema nung mangatettep alitsüsa akok, saka iba (mangyangba) atema pai temelungtetba tulu nung inyakogo. Ni pa nem tenüngsang agütsür,” ta Kejriwal-i ashi.
Kiralongrartem amakba anogo nunga Kejriwal-i army nem tenüngsang agüja liasü. Iba sülen anogo ka lir pai Delhi Assembly züngsemtem dang, “Tang mapang ya Centre pusemtsü mapang, Centre den mangatettepjibo tesülen bentettsü,” ta shia liasü.
AAP tongti lenir, Kejriwal-i maongka angu shia Ato kilonser aija arur, ajisüaka kiralongrar onük nung Modi-i mera takang agia inyakba atema pai Modi nem tenüngsang agütsüogo.
Pakistan-i, Indian army temi amakba osangji tiyazü ta osang prokba dak sentakba nung Kejriwal-i “Pakistan Army yazü osangtem jungkai adokjang ta ni Ato kilonser dang mepishir,” ta ashi.
Taoba Brihostibarnü Indian army temi Pakistan nung kiralongrartem tesep amakdang kiralongrar 38 tepset, ajisüaka Pakistan-ibo iba osangji tai, ta shiogo.
Tanü iba dak sentakba onük jembitsü asoshi Pakistan Ato kilonser, Nawaz Sharif-i party ajak senden ka ayongzüka liasü, aser iba senden nung sorkar anemer tongti aser yimtenren lenir, Imran Khan-a dena liasü.