Assam-Meghalaya Peace Forum-i AFSPA akhanger

Shillong, October 3 (Agencies): Meghalaya kübok Garo Hills tesem nung Armed Forces Special Powers Act (AFSPA) benoktsü atema Assam-Meghalaya Peace Forum (AMPF)-i takhangba agütsü.
September 29, 2016 anepdang South Garo Hills district kübok Songotagre yimtsüng nungi Assam nungi shishilembar 9 tashi A’chik Songna An’pachakgipa Kotok (ASAK)-i pur aoba sülen Garo Hills nung AFSPA benoktsü atema takhangba agütsür.
“Onoki Garo Hills nung AFSPA benoktsü atema akhanger kechiyong arrtsü anatsülen alirtem tashiyim agi pur aoer aser tepseter” ta AMPF Chief convenor, Moniruz Zaman Moni-i osangbener dang ashi.
Ozüng alema mapa balala inyakba ajanga Assam-Meghalaya arrtsülen rongsenren tsütsü terenlok mapa meinyakteter aser AFSPA ozüng benok nungdang azüoktettsü, ta Moni-isa shisem.
Yashi, AMPF teshimtet telok den South Salmara, Assam nung Additional Superintendent of Police Dhrubajyoti Bora aser army telok kati West Garo Hills district Police in-charge, Mukesh Singh den Tura nung ajurutep.
Telungpurtemi nisung 9 pua bener aoer rongnung nisung ka- Saher Ali-i Chokpot tesem nungi jena arutet aser pa anizüktsü atema AMPF telok Tura-i ao.
Shishilembartem chioktsü atema nisungpurtem jagi sen lakh 20 meshia liasü.
“Onoki Meghalaya police nem tebilemba ajak metetdaktsüogo aser tanüngba shishilembartem kümzüktsü atema mapa inyaktsü mepishiogo” ta Moni-isa osangbener dang ashi.