India-i PoK nung kiralongrartem tesep amakba Russia-i pusemer

New Delhi, October 03 (Agencies): Narendra Modi-i aniba sorkar atema jenjang tajungba küma Hombarnü Russia-i tawa India-i Pakistan-Occupied Kashmir (PoK) nung kiralongrartem tesep amakba pusema jembiogo.
India nung Russia ambassador, Alexander M Kadakin-i, “Uri nung army 20 tepseter kiralongrartemji Pakistan nungi aru ta mezüng sangdongba linükji Russia lir,” ta ashi.
Paisa, “India anema kiralongrabaji onoki anemer, aser onoki ibaji yimjak nung sangdongogo. Item ama mapa anema linük ajaki pusemtsüla,” ta ashi.
Ano osangbenertem den jembidang Kadakkin-i Pakistan dang, arrtsülen nungi kiralongraba anenang, koba ajanga India yirutsür, ta ashi.
Alima sabang nungi Pakistan-i, Kashmir nung meimchir temeten anema inyakba indang jembiba onük nung tasüngdangba ka langzüdang Russia ketdangseri, “Kodang kiralongrartemi sepai teseptem mesüra yimjung nung aliba India nunger makdir, ibaji meimchir temeten anema inyakba tamajungtiba lir,” ta ashi.
Tawa Russia-Pakistan military exercise agiba dak sentakba nung tasüngdangba langzüdang pai, “India-i shisa mebulutsüla, kechiyong ibaji linük ana tsüngda benshia aruba exercise ka dang lir,” ta ashi.
Paisa, “Iba exercise omenji kiralongra anema raraba lir. Anungji Russia-i Pakistan nunger dang kiralongrartemi amakba nung par Army mamshitsü sayutsü,” ta ashi.